Alor kossa toussala i vé dir ?

Avèk vakssin, lo vaksiné i fabrik bande zantikor, mé avèk lo tan la doz zantikor dann san i diminyé é sé pou sa k’i fo piké, épi arpiké. Konmsa nout lorganism lé paré shak foi lo virus va déklare anou la guèr. Mé piké, épi arpiké, épi ararpiké, sa in solission-sa ?

Pétète avèk d’ote maladi, mé pa avèk in virus i prézante anou konm i di « avatar apré avatar »-zot i koné avatar sé lo même zafèr mé prézantan diféraman... Lo diréktèr l’OMS (office mondyal pou la santé) la fine fé in l’avèrtisman é li la dénons bande nouvo doze pou bande rish.

Li lé pa konte in troizyèm doz, mé li prévien i fo alé atak lo virus épi son varyan landroi li l’apré muté. Donk i fo ansèrv in miks, avèk vaksin, médikaman, tizane, épi lo mask épi toute kalité mézir i pran in pé partou dsi la tère.

L’OMS la tir lo signal d’alarm : zot i rapèl sé li k’lavé domande in mondyalizassion bande vaksin avèk la possibilité pou toute péi pou fabrikali in pé partou dsi la tère. La pa ékoute ali biensir pa pars li na poin rézon, mé pars bande kapitalis la bézoin larzan an takon. Astèr li di lo vaksin lé myé ké arien mé sak i fo sé in médlé pou soign la maladi dann lo monde antyé. Li la rézon, mé bande gouvèrnman i fé zorèye koshon dann marmite poi.

Alor konm mi di, alon prépar anou pou in nouvo varyan, alon prépar noute zépol in katriyème, foi, in sinkyème foi ziskatan noute kor va di éstop ! zour-la la vérité prémyère va fini par éklaté : ki di virus mondyalizé, di mondyalizassion lo soin é pa in trètman par plass, par plass konm koméla.