Zot la vu konm moin, lo Fron nasyonal la ranport bann zéléksyon éropéèn an Frans ! I fé koz tout formasyon politik ; i ésay konprann ou fé konprann bann zoditèr téléspéktatèr koué la rivé ; nana sak i di : « oué, sé lo gouvernman, li la fé mont in mékontantman zénéral, bann zéléktèr la vot in méfians, in défians kont tout roprézantan politik ! »
Nana sak i akiz la droit ; i di la droit minm la pa giny fé linité, an plis zot lé anbirlifikoté dann zafèr la zistis ou sinon a moin pli kalifié ke ou po diriz l’ UMP !? Bin voyon…

Lot i agard l’ Ukraine, i di : « rogard laba, banna la konpri l’ Erop sé in bon nafèr é minm lo sistèm démokrasi an Frans é an Erop sé in bon nafèr ! ».
Non, kouyon, la pa di a toué alé war sak i spas laba, rogard dovan ton port, ton propr premié minis i di : « nou lé an plas, nou la giny lo chok mé nou va rézisté ; la fot la pa nou, nou nou travay po amélior somaz, lozman, rotrèt, inkièt pa, lès a nou nardrès la Frans ! »
Oui, mé, ziskakan ? Ti voi pa lopinion piblik i donn a toué ék ton prézidan mové sondaz ?

Solman, si Marine Lepen i domann gouvernman démisioné, minm lo Prézidan, arroganiz zéléksyon dépité !! Ou sa ni sava ? Toultan nou pas déléksyon an éléksyon !
Kan sa i travay po rotrous nout mans somiz, transpir in pé po armont lékonomi la ; la poin dot moyin : par lo travay, nou var giny rosours, nou var rotrouv la kroisans, la konfians nout konpatriot, lo kouraz, lespoir !
A ki la fot ? A nout tout la fot ; alon fé linité ladsi.
Ki lé responsab, nout tout, nou lé responsab !

Justin