Tazantan sé la limyèr k’i éklèr pa, tazantan sé dann la shass dolo wi trouv in problèm, tazantan lo také i tak pi mé li détak, tazantan sé d’lo, tazantan sé lo bann fèrmtir rouvèrtir. Parl pi kan sé lo karo k’i pète in kou san k’wi konpran pou kossa..
Sré bien si ou l’avé dsou la min in Mishèl Morin in moune konm k’i diré i gingn fé tout zafèr, in toush-a-tout konm i di laba dann déssèrtiènn réjyon dan La franss épi sa lété ropri issi shé nou La Rényon. La prèv ? Mi sort lir sa dann diksyonèr Alain Armand épi dann somi-lo mo Daniel Honoré.
Problèm ? Pou Armand konm pou Daniel in mishèl morin sé in bon zouvriyé. Pou mon papa sré plito in toush-a-tout, in kalité d’moune lé bon pou massak in travaye plito k’fèr kékshoz de bien… laba dan La franss mi panss sré plito in om a tou fèr mé mwin lé pa sir san pou san.
I paré mèm in zour, néna bien lontan, dann in gazète l’avé in pti lanonss, pou anbosh in Mishèl Morin. Donk in moune kapab rofé bann travaye lantikité avèk bann zoutiy lantikité galman.alé débarbote aou ladan !
Alé ! mi kite azot rofléshir la dsi é ni retrouv pli dvan, sipétadyé.

Justin