Médam zé mésyé, la sosyété, pé s’fèr mi tronp ! Pé sfèr mi oi pa la vérité klèrman, pé s’fèr sak mi di épi mi rodi lé pa vré pou vréman. Mé poitan, moin néna konm l’inprésyon moin néna rézon. Dsi koi par l’fète ?

Dabor dsi bann figir k’i aparète dann bann gran médya : kan mi rogard télé Moris, mi antan bann morisien apré diskite dsi tout zafèr. Mi antann bann zoinalis morisien apré koz avèk bann zékspèr, sansa bann résponsab morisien dsi tout késtyon i intérèss la Répiblik Moris. Mé isi la Rényon la pa konmsa : mi antann bann zoinalis in pé rényoné d’ot non, apré intéroz la plipar d’tan in bann moun lé pa d’isi, apré batize azot résponsab, ékspèr, konésèr é ni pé an avoir konm linprésyon banna i koz de tout mé pa d’ nou-an touléka, sé konmsa ké mi oi épi mi san lé shoz.

Zot i koné isi nou la érite d’in komité kovid-19 mé la plipar d’tan-é moin la bien gardé pou ète sir mi di pa dé koneri - tout lo bann moun té pa rényoné. Moris l’avé son komité, é la plipar lété bann morisien. La pa pou sa bann moris téi di plis la bétiz ké lo komité pou La Rényon. La pa pou sa komité La Rényon l’avé l’èr di dé shoz pli intélizans – sé sak mi pans zordi ankor.

In n’ot afèr, kèl lang téi koz : isi La Rényon lo komité téi koz fransé é tanpir pou nou si ni konpran pa zot. La pa zot traka vi ké zot i koz pou zot konsitoiyin d’laba, sansa pou in pti trépé d’moun sou la ména s d’in gouvèrnmann laba. Moris, moin la ékout inn-dé séans lo moun kisoi minis, kisoi diréktèr d’sèrvis, kisoi médsin, téi koz kréol morisien é m’a dir azot in n’afèr : an kréol morisien i pé koz osi bien ké dann la lang bann fransé. Konm an kréol rényoné, i pé koz osi bien, osi sèryèzman k’an fransé. Bin alor pou kosa la pa fé konmsa ? Pars lo komité rényoné téi koné pa koz kréol La Rényon.

Astèr, rantre nou, si la kominikasyon i fé dann la lang bann fransé, si lo bann kominikan sé dé lokitèr dann la lang fransé, si bann désidèr la plipar rant zot sé bann moun épi bann sosyété déor, kosa i rèst anou ? Sirman pa la métriz dsi nout prop zafèr. Alor kan mon kamarad Lucien di LULU i di : kisa i komann nout péi ? Mon répons : malorèzman la pa nou, antouléka sifizaman é pou lo lésansyèl mèm avèk la désantralizasyon.