Yèr moin la lir dsi l’internet, lo trètman Dr Raout la mète o poin, li épi son bann lzkip, lété in bon trètman pou lo covid-19. Sa la étone amoin in pé pars moin la antann dé-troi tèt zèf, dann télé apré di trètman-la lété fé la va-vite é l’avé poin la prèv li lété éfikas pou bate la maladi a tèr. Biensir, mi sava pa arkomans dovan zot lo sobataz la lang bann zom de syans la fé rant zot la dsi mé si zot la suiv in pé l’afèr, zot i konpran kosa mi vé dir.

Mé oila in réfléksyon l’ariv dann mon tèt. Mi vann azot sa konm moin l’ashté. Ala l’afèr : si lé vré lo trètman lo profésèr Raout sé in bon trètman é si lé vré li lé éfikas pou vanj kont lo korona virus, moin lé a d’mandé pou kosa dann in bonpé lopital la bord trètman-la dsi koté ? Mi koné pou kosa pars dann bann média l anparl sète afèr la san sète an d’suit.I paré té i fo éspérimant ali pandan bèlaz-é - botan. Mé oila, si zamé, lo défo d’trètman la fé mor in bonpé d’moun olèrk pran azot dann bra la mor. L’èrla, moin lé a d’mandé koman bann résponsab i apèz zot konsyans. Késtyon initil sirman, mé késtyon moin nora poz amoin si moin lété zot plas.

La frans lé loin ! Alor alon koz in n’afèr pli pré. Alon parl la tizane bann syantifik la fé Madégaskar. Néna in koté i di sa sé in médikaman mirak é néna d’ot i di konmsa san molir médikaman-la lé osi bon pou lite kont la maladi k’in pansman dsi in zanm doboi. So kou isi sé l’OMS paré-t-il k’i mont o konba pou dir la tizane-la i kass pa lo kat pate in kanar. Mèm késtyon k’an o la : si par ébzanp demoun i mète a mor an poundyak dann Mayotte sansa dann in n’ot landroi, é si l’androi i ansèrv lo médikaman – donk in pé partou dann l’afrik-la sov domoun. L’èrla moin lé a d’mandé kisa zépol lé asé larz pou ankèss in résponsabilité konmsa.

Kant mèm, mi pé dmann amoin koman la konsyans in pé i fé pou amorti in kékshoz konmsa san fé tro déga dann koko lo résponsab. Si biensir sak mi antan k’i di lé vré.