Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi trouv bann rouj-de-fon lé in pé gonflé ; si i kroi azot, zot la fine rofléshi dsi tout z’afèr, zot la fine trouv solisyon pou tout problèm. Bravo ! Mé si lé vré, pou kosa nou na ankor in kantité problèm, alé oir zot lété o pouvoir si tan tèlmann tan. Mi profèr di, zot la pa trouv tout solisyon, mé pétète inn rant-rant é la plipar d’tan sa lété valab dé zour. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr, déza inn bone shoz ou i rokoné nout parti la propoz bonpé solisyon mé si la pa rant dann l’aplikasyon i fo plito rogard koté sak la ral an aryèr plito ké fé avans lé shoz. Mi gingnré trouv in kantité solisyon pou fé mon démonstrasyon mé pou zordi inn-dé sar sifizan.

Matant kisa la gingn l’idé fé la rout tamarin si sé pa bann rouj de fon ? Ou i pouré rodé san trouvé pars lo solisyon lé dann lo problèm pozé. Astèr kisa la di i fo fé in rout moiyène altitid pou fé lo tour La Rényon si sé pa nou. Poitan gouvèrnman, konm bann droit l’avé lokazyon antroprann in kékshoz konmsa mé zot la pa fé. Pou kosa ? Pars zot té i oi pa pli loinn ké bordmèr. Mèm zordi, kan avèk réshofman klimatik nou lé paré pou gingn kokman avèk la mèr, zot i oi ankor épi touzour bordmèr.

Matant, kisa la di lo tout voitiraz la pa bon ? Kisa la di galman i fo fé lo trin, kisa la di osi i fo fé bann finikilèr, kisa la ankouraz voiyaz an vélo ? La pa béoin alé rode bien loin. La plipar d’tan sé nout parti kominis la propoz bann bon zidé konmsa. Ou i vé, ou i vé pa, lé konmsa. Tok ! Pran sa pou ou !