I rèt a nou in zour, in nwuit pou byin réfléshi. A kisa nou sar donn la klé pou rouv la port nout lasanblé départmantal domin ? Poitan, ziska zordi ni koné pokor, kèl rol lo bann konséyé nora, ni koné pokor kèl konpétans pou lasanblé an késtyon, Dizon ni sar ashté in koshon dann in gouni, koshon lé blan, koshon lé nwar ? Tousala sora réglé an 2016/2017 i prétan. O diton pou lo sosial inkièt pi, sa pou lo moman lé kalé i prétan, sé lo lasanblé minm va okipé.

Dimansh kan ni sar voté, tronp pa nou, mazinn in pé nout famyi, nout bann marmay, mazinn in pé nout bann vié moun parské lo lasanblé départmantal ali minm i gèr tout larzan pou lèd sosial, ali minm i désid konstri bann kolèz, ali minm i pé èd kré bann lékipman kiltirèl, li pé konstri bann lozman sosio, mézon pou vié moun, rouv la krèsh tousala. Fé pa konm in pé i di arèt èk sa vik pou zot tousala sé lasistans. Lé vré pou vréman néna i konfonn la solidaridé nasyonal èk lasistans.

Mé pou fé tousala i fo larzan é zordi léta i raz la pint, mi koné pi koman banna i sar zwinn lé dé bout vik néna dé plizanpli d’moun dann lo bozwin é dé mwinzanmwin larzan. Boudikont léta i an lav lé dé min. Kèl famyi d’moun na pwin inn i kont la d’si. In koté i di a nou i sar fé in bon politik pou vié moun, in ot koté i rotir larzan bann koléktivité. Dimansh kan ni sar voté mazinn tousala, mazinn dopi lontan kisa i okip lo plis lo sosial, kisa la mèt lo RMI an plass, kisa la sobat pou légalité. Boudikont shwazi rant kisa lé pou la solidarité, kisa lé kont !