Bann moun i koné latlétism épi i yèm bann éspor-la i rapèl bien shanpyone-la : in zoli madam noir avèk toultan in gran sourir dsi son vizaz. El téi kour pou Lékip de frans mèm si èl lété né dann in péi l’afrik. L’ané 2010, èl la nyabou sirprann tout demoun épi èl la gingn in médaye d’or dann shanpyona d’érop. In médaye d’or, sa la pa arien kant ou i pans èl lété nénène marmaye dann in zardi zanfan é, bann shanpyona d’érop, èl téi kour pou La frans. Vinkèr l’ané 2010, èl la kite bann podiome l’ané 2014, konmsi èl téi pass sinploman par la.

Poitan l’avé do koi dévlop in lézann. Poitan l’avé do koi ékri in roman dsi la vi zoli madam-la. Bin alor, kosa l’arivé ? Sinploman èl la kite lo mond bann shanpyon. El la ropran son travaye konm nénène zanfan é pi èl la maryé é son mari i travaye dann la sékirité. Travayèr pov l’inn konm l’ot ! El néna troi zanfan zordi é lo pti famiy i viv dann in lozman sosyal lo bann mur lé konmsi zot l’avé gingn la lèpr. Katriyèm létaz san lasansèr. Mèm pa la plas pou bann marmaye zoué. In pé konm tout marmaye i yèm zoué. Lo sor la frans pov konm dé milyon épi dé milyon d’moun.

Mé in travayèr pov in pé éspésyal kant mèm : la pa tout i gingn shanpyona lérop dé san mètr. Normalman la fédérasyon fransèz l’atlétism i lèss pa son moun tonbé konmsa ni pou la késtyon finans ni pou l’éspor pou vréman. Poitan son dépar la pa fé tapaz. Poitan bann zournal éspor la pa in térèss son ka. Sépa kisa i pé ésplik amoin sa ? Sépa kisa i pé dir amoin koman in shanpyone konmsa, in si zoli fiy, tayé pou ète in védète. Lé randi landroi èl lé randi zordi ? Koman bann moun la ote la lèss aèl défil an zouritée konmsa.

Mi pouré dir sé pars èl lé noir é pars èl i sort dann in péti étranz mé la pa la vérité pars néna in bonpé shanpyon noir la fédérasyon la pa lèss tonbé. Alor pars lété in madam, la pa vré non pli pars in bonpé madam noir la fédé i lèss pa zot tonbé.
Zordi si i domann aèl ousa i lé son bann médaye, èl i réponn sinploman èl la mète azot dan la kav. Zordi èl néna 32 zan é tazantan èl i vé konm rotourn dann l’atlétism, pou amontr si èl la gingn in bonpé bann gran kours lété pa par azard mé pars èl l’avé la kapasité pou gingn bann kours-la. L’avnir va di anou si èl i rovien dann l’atlétism, si solman i fé ankor in kont avèk èl zordi.