Oté

Kisa néna in l’intéré la-dan ? Poz la késtyon, sé done la répons sanm pou moin

Justin / 16 avril 2018

JPEG - 43.6 ko

Samdi matin, moin la rannamoin kont, konm sirman in bonpé d’moun, La Frans, l’Anglétèr épi l’Amérik la déside bonbard la Syrie. Aprésa, dann télé moin la vi konm tout lé z’ot bann misil apré travèrs lo syèl avèk son kortèz fizé la limyèr. Aprésa, moin la lir dsi bann rézo sosyal sak bann partizan Assad épi sak son bann z’ènmi la di.

Solman, dann tout afèr la guèr néna bann manipilasyon. Zot i souvien kan l’amérik la désid bonbard l’Irak, pars li l’avé par si par la in bann éstok lé zarm déstriksyon masiv. L’Irak la pèrd la guèr konm zot i koné é bann solda z’amérikin épi d’ot ankor la parti fouye partou. Fouyé oui é pa pou zoué mé la pa trouv in sèl zarm déstriksyon masiv. Zordi toulmoun i koné sa sé in mansonz d’éta amérikn, pou zistifyé son l’agrèsmann l’Irak é bien antandi gran péi la, la pa di in sèl mo d’éskiz-kansréti vizavi lo pèp irakien la kaziman pèrd son l’am dann so bann bataye la k’i fini pa.

L’ané 2013, tout bann télé, bann zournal la ésplik anou an long é an larz lo l’armé Assad - prézidan La Syrie-la fé bonbard désèrtin l’androi rébèl avèk bann z’arm shimik. Dabor la bonbardé épi la ankété ziska l’ané dèrnyèr é l’ané dèrnyèr la trouv in n’afèr té pa atandi : lo bann bonb shimik téi sort pa dann in rézyon Assad téi konytrol mé dann in réjyon robèl. Donk sé bann robèl la bonbardé mé pa bann la Syrie ofisyèl. Biensir pa d’zéskiz, pa d’rogré, pa in sèl ti mo pou dir bann z’oksidantal la tronpé.

Astèr, l’ané 2018 la bonbard ankor avèk ban bonb shimik. Tousuit la di sé lo l’armé Assad la fé sa. Mé dan l’ot kan i di sa in n’afèr roganizé par bann robèl. Vandrodi soir la bonbardé é kan va trouv la vérité dé moi é dé z’ané sar fine pasé. Pars dann tout z’afèr i fo touzour rode kisa néna in l’intéré pou fé sa : la pa gouvèrnman la Syrie ! La pa la Rissi ! Alor kisa ? Kisa néna l’intéré la-dan. Poz lo késtyon sé done la répons.