Moin la touzour antann dir, la pa mank gran-shoz pou k’i fé pa la loi départman fransé pou bann kat vyé koloni, nou anparmi. Si bann dépité l’Outre-mèr l’avé pa fé la présyon, té in n’afèr fouti, klasé dann ran bann katédral kasé, bann prozé mor-né. Pou Mayotte, gouvèrnman, droite konm gosh, lété pa présé transform ali an départman. Mé dési la késtyonn l’égalité sosyal, na ankor d’lo pou koul sou l’pon. Bann Maoré, d’apré sak mi konpran, lé pa dispozé kontant azot bann ti mézir gouvèrnman i pran tazantan.

Si ni plonz in pé dann nout pasé, ni ansouvien in gran grèv bann fonksyonèr la fé dann tan l’ané 1950, pars l’avé tro l’inégalité rant bann fonksyonèr té i ariv épi sak té déza la. Pou sak té i ariv, l’avé tout z’afèr : l’indèks koréksyon, l’indamnité la vi shèr, lo konjé administratif, épi la prime l’éloignman. Pou sak lété sir plas, dé-troi shikète.
Mé banna la fé la grèv épi la fini par gingn rézon. Sof ké sak lété dan lo privé, zot té kondané pou aspéré. Mayotte galman, lé shoz i éspas konmsa... Konm di lo kont, toulmoun lé égal, mé plizoumoin. In pé lé plis, in pé lé moins.

Si mi rapèl bien, moin la antann parl ankor in drol n’afèr. Kan in fonksyonèr lété muté, son konjoin té i vien avèk li. Lé normal ! Mé sak lé moin normal, sé ké lo konjoin, si li lété pa fonksyonèr, li té i trouv souvan dé foi in boulo dan l’administrasyon, sansa dann in pé l’antropriz. Mi souvien bien Kréol lété bandé pou in n’afèr konmsa. Mé son kolèr, té i jène pa l’administrasyon. Konm di bann z’ansien, lo zo i soutien la shèr ! Moun déor i soutien rantre zot, é lo sirkui kolonyal i roul ron... Lé ga, i paré, la-ba dann Mayotte, lé shoz i marsh konmsa galman é dopi in pé d’tan. Noré mèm in piblisité pou bann konjoin pou dir banna : kisoi avèk diplonm, kisoi san diplonm, na in travay i aspèr azot la-ba !

Justin