In zour néna in gran profésèr la di amoin in n’afèr é z’afèr-la mi pans mi oblira pa li ziska mon dèrnyé zour. Li la parl amoin in pèrsonaz dann in liv zistoir. Mi rapèl pi lo nom mé sak mi rapèl sé dann kèl ka li la mète ali. Donk, in nuite, lo boug sirman apré foté par-la la pèrd in gro pyès larzan é konm tout demoun li sava rodé dann l’androi li la pèrd. Pa dann l’androi li la pèrd pou vréman pars néna in plas kléré par la line o plin épi in plas dann fénoi. konm fonn marmite.

In dalon i pass épi i trouv ali, i domann ali kosa l’arivé é si, é la, épi li rakont son n ‘afèr. Lo boug i oi li apré shèrché dann l’androi kléré i domann ali si lé sir an avoir pèrd son kékshoz dann l’androi kléré. Lo boug i réponn : non, li la pèrd dann l’androi lé noir konm in fonn marmité. Lo ga i di ali, i fo li sava rode l’androi i fé noir. Ala son répons : mi èmré, mé landroi i fé noir, mi oi pa arien é dann l’androi i fé klèr mi oi mé moin lé sir mon kékshoz la pa tonm tèrla.

Konm i di souvan dé foi, sa sé in zistoir absird, mé mi lèss azot rofléshi la dsi.

Mi arvir so kou isi dsi l’idé néna dann mon tète. Samdi, moin la trouv in ga i travaye dann in gran l’antropriz. L’antropriz-la i vé anbosh dé mékanisien rényoné pou alé dann in formasyon épi pou aprann lo métyé konm k’i fo. Mé ala ké lo kad i anbosh i di li rode sa isi La Rényon é li trouv pa. Li domann si i fo in gran éspésyalis, i réponn ali non zis in moun néna son CAP.

Sé la mi pans mon zistoir absird : dé ga avèk CAP mékanisien sa néna sirman La Rényon mé i fo alé rode ali l’androi li lé. Si ou i rode ali l’androi li lé pa la, ou lé riskab pa trouvé. Sof, si dann out tète, ou néna dé kamarad la Zoréyi é ou i pans fé vnir zot dé pou arvni dsi sak moin la mark an-o dann tit mon modékri : soi ou la mal rodé, soi ou la pa rode ditou, sansa ou la fé sanblan rodé pou boush lo zyé kréol.

NB-Soi an-o laba dann out yérarshi néna in gran shèf blan la done in konsign pou fé sak ou l’apré fé.. é, in gran shèf blan i fo ékouté sa !