Pétète zot, sansa inn an parmi z’ot famiy i rod travay. Pétète an parmi inn-dé nana gro-gro diplôme i trouv pa déssou la pate shoval. Somanké, nana plis ké mi kroi akoz nana in bon pé diplomé i rod travay épi i gingn pa, sansa lé malizé d’gingn kèkshoz i vo la pène. Lèr moin l’apré ékri, moin lé sir plizièr santène zènn, talèr plizièr milié, l’apré rod travay.

Kissoi déssi intèrnèt, kissoi dann zournal, kissoi dann bann z’anons gratuit, bon-bon plas travay i mank pa, épi bien péyé mounoir. Alor, in bonpé i ékri z’ot CV, i anvoy z’ot foto, i di konm k’i fo diplonm zot nana. La pa possib, si anparmi tousa la plas travay na poin inn pou mon famiy, mon nové, mon zanfan, famiy, zanfan mon kamarad. Zordi lé sir, lé fini avèk lo RMI, fini avèk lo bann ti-kontra , avèk lo pti zalokassion shomaz.

Mé lo tan i pass. La répons bann zènn i atann i ariv pa : in moi, dé moi, troi, épi sink, épi sète. In zour, na in répons i ariv, out « candidature n’a pas été retenue », sansa « suite à notre entretien du... », sansa ankor dé mo d’répons wi gingn pa. Kissa i pé asplik amoin in nafèr konmsa ? Pou kossa i tourn nout bann zènèss an bourik konmsa ?

Justin