Si mi fé mon bazar lo moi é si mi pran in papyé pou marke dessu,a tou kassé, mi fé in list avèk kék dizène zartik. Pa kèk milyé bien antandi. Pa kék dizène dé milyé siréssèrtin. Donk mon promyé konklizyon bande demoune la désside fé bande gran sirfass, i vé mète le moune dann in sityassion pou ashté dé shoz lé pa vréman nésséssèr, donk dé shoz mwin la pa bézoin,dé shoz mi yème pa, épi dé shoz forsémani sava gaté mon kaz.

Mwin néna in kamarade, son famiy l’avé in boutik shinoi é toultan li téi pass son tan pou looké dann komèrs. Pa pou ashté, pars son madame sé èl ki ashté. Biensir an i ariv la kaz épi k’i désharj loto, li konstate néna an parmi son kommission, in ta avèk in paké produi. L’èr-la é pa arienk in foi, li domande son madame si èl i sava rouv in komèrs son kaz.Lo madame i zistifyé son shoi mé ni oi bien si i kontoinyé l’èr dispité lé pa loin.

Finalman inn é l’ote i pé an avoir rézon : lo madame ki fé provizion pou pa z’ète an manke pars normalman néna pi bonpé zafèr i manke issi sof si i roganiz la rarté é défoi i roganize pou vréman. Son mari k’i konstate l’ashète tro d’zafèr, é sa i sava déopoze dan la kaz, a pi konète kossa k’i fé avèk.

Mon koté mi di lé possib viv avèk moinss produi ké néna koméla é normalman sa i anpèsh pa viv korèktoman, manz korèktoman pi sirtou dépanss mwin k’i dépanss koméla.

A bon ékoutèr, salu.