Mézami, dann zardin, si ou néna in frui osinonsa in léguime é si wi vé ronouvèl lo plan, wi garde in frui — lo pli zoli possib — sansa in léguime — lo pli zoli possib. Aprésa wi ramass lo grin pou somé épi wi pé gingn zoli-zoli plan. Mi rapèl kozman mon méyèr kamarade l fine pass l’ote koté téi di : in zour mwin la domann in plantèr koman i fé pou gingn in gayar pyé ponplémouss ? Lo plantèr la réponn i fo rode lo pli zoli frui é ramass lo grin é aprésa plante lo grin. Sé pou sa kan li téi di amwin sa li téi rogarde son pyé ponplémouss avèk in fyèrté zistifyé.

Biensir sak i pé fèr avèk lo frui épi lo léguime, wi pé pa fèr sa avèk demoune. Demoune kan son l’èr i ariv, la pa moiyin dir li vien pa, li lèv son balo é li sava… Romark pou zanimo sé nou lo zonm i garde lo pli zoli pou li komanss fé son troupo avèk é dopi ké lo monde lé monde i fé konmsa.
Sa i vé pa dir mon kozman sé in kozman mantèr pars li di la vérité, fransh vérité. Ni artrouv pli dvan, sipétadyé.

Justin