Nana in kozman fransé k’i di konm sa : « Nul n’est prophète en son pays ». Toultan, mi kass mon tèt la-dsi, épi mi rod pou kossa i di in n’afèr konmsa. An plis, la poin ins kashé, i paré i fo prann sa o promié dégré : in gouyav dé Frans lé pli gouté k’in gouyav La Rénion... Zot i konpran, si in n’afèr konmsa, i fé bouy mon pti pé d’san : mi pé pa anval in zèf gaté konmsa, kant mèm !

Kan gouvèrnman fransé la anvoy in préfé konm JPP, li la kalkil boug-la té plis intélizans ké nou, é té plis an kapasité... Si, olèrk défann nout dignité, in pé bann kourtizan lavé pa bate la min. Si tout lavé rofiz son bann kado anpoizoné, nou nora gingn kal in sistèm konmsa. In pé la rofizé, la gingn boubou dsi la lèv, mé in bann la flat lo boug : « san mantir, si vot ramaz i arsanm vot plimaz, étsétéra... ».

Si zordi ankor, in pé i pans in Rénioné i pé okip alèz-blèz bann plas lo ta ; la plipar - mèm in bonpé kréol La Rénion - i pans pa in Rénioné i pé okip in plas linzényèr, diréktèr, in plas lankadroman. Alor, kissa lotèr si zordi ankor lé konm sa ? Kossa i pé fèr avèk in sistèm konmsa ? Si i mèt pa sa dann poubèl l’istoir.

Justin