Koman i fé l’Istoir ? Sa in gran problèm, é bann filozof la pa mank poz azot késtyon-la. Pli pir, zot la obliz bann marmay i pass Bak kass zot tète la-dsi. In pé la poz azot késtyon-la séryèzman. In pé an kassan ti-boi. Sé lo ka lo filozof Alain, lo boug té k’i di konmsa : « L’istoir i fé avèk dokiman, mé kossa i lé in dokiman ? ». É li réponn : « sa in vyé bout papyé asiréman... la dan lo ra, lo fé, épi l’obligasyon ansèrv la shèz pèrsé la lèss passé par koud’shans ».
Astèr, si in zour, dann in bonpé d’tan, toute bann dokiman la disparète déssi lo san promyé zour la prézidans Didier Robert. Si la rèss arienk Zournal dé lil lo vin avril 2011 é dann milyé bann fèy lo lédito méssyé Montrouge. Si in listorien, moun kiryé, i sèy konète pou kossa la ronons lo tram-train l’ané 2010, zot va trouv in rézon. Ala lo rézon zot va trouvé : sé pars dann zéléksyon prezidansyèl 2007, Ségolène la gingn plis 60 pou san bann voi, é Sarko la gingn moins 40 pou san. L’èr-la, lo boug té bandé an trann-sis é li la déside pa fé lo tram-train. Lo gran zournalis i di pa nou si sé par la fote Sarko la déside ossi pa fé la MCUR, ronons l’otonomi énèrjétik, kass Gerri, lo projé Ravenal, é pétète domin kass ossi Air Austral.
An dé mo, sé pars Sarkozy lé mal fondé, é Didier Robert alor ? Li la zis ékout son protéktèr ? Li la pa oz alé kont la volonté lo pti roi dsi son trone mal assiz. Méssyé Montrouge, par azar, ou i prandré pa nou pou in bann moun demeuré ? Ou i prandré pa nou pou dmoun san sèrvèl, pars sof out réspé, ni souvien bien tout kalité kontorsyon out protézé-protéktèr la fé pou ariv a dir li ronons tram-train. Ni an souvien bien, konm ni koné bien kozman bann gramoun lontan té i di konm sa : « la pa bézoin tortiy lo ki pou sh... droite ! ». Aou ossi i pans konm sa !

 Justin