Dimansh té zéléksyon pou lo départman, isi la rènyon si 25 kanton néna ryink dé lé éli promié tour, dé binonm. Néna inn ti gingn domoun la parti voté pou vréman, dizon té prévi osi konm sa, tout bann éspésialis lavé prévi in gro to labtansyon, mé sinkant pour san pou nou la rényon i dépass minm lo to prévi. Mi ékout inn dé komantèr zordi kiswa dann télé, kiswa dann radio ousinonsa zournal papié tout i di pou la ba déor banna la vouli sanksyonn lo gouvérman vik la politik li aplik zordi i tourn lo do èk sak li la promèt yèr.

Bann kandida la mazorité prézidansyèl la gingn plis lo kou la ba i prétan. Parti sosialis la dsann an désou 20 pour san, koman in gouvérman i sar gouvèrn in péi èk 20 pour san dmoun sontousèl ? Tout lo rès lé kont. La Rényon, la drwat lé dovan, la drwat i rovyin in pé partou. Dopi dé zour banna i roul la kèss, anndan la sak la zoué in gran rol sanm pou mwin sé lo bann mèr, konm néna in gro to labtansyon, sinploman lo vot zanplwayè minisipo èk sak bann sibvansyoné nasé pou fé gingn lo mèr.

Konm i di, bann mèr la drwat i zoué si di vélour zordi. Tout lé fé pou angrèss la drwat, sirtou dopi 2010. Dopi 2010 la drwat i ansèrv mwayin la rézyon, la ansèrv mwayin la rézyon pou kapar bann minisipalité, la kapar la kominoté dkominn èk mwayin minisipal é la zordi i kapar lo départman èk mwayin minisipal èk la kominoté dkomin, mi pé asir a zot sé konm sa ki roul dan lo sid. Dapré zot dopi 2010, kissa la donn lo fouèt pou koup nout ki ?