Sète ané, nora bann zé olympik. So kou issi, i fé dan la Chine akoz lo komité la désid fé sa la-ba ; la fé in spès konkour pou la po patate épi sé so péi-la ké la gagné. I arsanm bann éstade sar paré, bann pisine galman, bann lotèl i roul ron, bann ésportif i antrènn a mor... Tout i roul ron alors ? Non, nana problèm, nana mèm in bèl zos, sé la késtionn Le Tibet ousa lo bann droi demoun lé pa réspékté. In pé i di mèm, k’i fo pa alé la-ba, k’i fo boykote bann zé akoz péi Chinoi lé pa réspéktab.Moin, mi éspèr si bann tibétin nana rézon, in zour zot va gingn rézon.

Mé kan mi pans in n’afèr souvan dé foi, mi pèrd somèy. Pou moin, in pé toute péi nana in koté lé pa réspéktab : dann in pé nana lésklavaz séxièl épi gouvèrnman i fèrm lo zié, dann d’ot nana travay forsé bann ti marmay... In pé la fé zénosid, d’ot i sava fé la guèr, san an avoir rézon dann péi la pa zot, d’ot ankor z’ot polis militèr i tortir bann prizonié la guèr, épi lo droi bann fanm la pa réspékté ..Armète èk sa bann kriminèl dé guèr : ! Sète-la nana plisk’an sifizans.

Alors, kissa lé nèt, kissa lé pur, kissa i réspèk vréman la moralité. Ékèl péi i aplik bien bann zoli-zoli tèks i port déssi lo droi bann zanfan, déssi lé droit demoun. Alors, konm i di dann légliz, kant in fam lavé tronp son mari : « Sak na poin arien pou roproshé i anvoy promié galé* ». Alors, kissa lé paré pou anvoy promié gronad péi ?

*parabole de la femme adultère

Justin