Vantredi moin la bien ékout mésyé Préfé kozé dsi sète afèr d’ korona-virus issi la Rényon é pou dir azot la vérité, néna kékshoz la pa bote amoin ditou : sé la manyèr bann zotorité néna pou fé port dsi lé zot la résponsabilité kan kékshoz i ariv...Si moin la bien ékout ali lo résponsab dann sète afèr d’korona virus, sé bann ti kolon La Rényon.

Kisa ? Ou, moin, mon famiy, pti boutik kan wi kass lo koin an-o la, bann jenn, épi tout la bann l’apré épi i sava pèye in l’amand zot lé pa an éta d’péyé. Nou la bien vi li téi aviz anou konmsa, avèk son fasson koz an solanèl, pou mète anou an akizasyon.

Astèr ni aprann dsi la késtyonn vanj kont la maladi, La Rényon sé lo pli mové zélèv dann loséan indien : akoz sa vik nou néna plis moiyin ké lé zot issi dann loséan indien... Ni aprann ankor bann médsin d’issi la poin lo droi pou préskri in médikaman konm sak lé rokomandé par lo profésèr Raout. Astèr i di anou ankor, si i kontinyé, pan an pan nout péi lé riskab ète pri dann in kouvréfé, pétète mèm in konfinman si dann dis zour nou-la popilasyon- la pa gingn fé mashine aryèr par raport la maladi.

La pa arienk in késtyon mi poz amoin , mé in bonpé : dabor mi rovien an aryèr dsi nout konfinaz alé oir la maladi l’avé pankor kontamine anou-dann moi d’mars sa !- aprésa kan la maladi l’arivé mi domann pou kossa l’avé poin mask épi la di anou mask i ansèrv pou arien ,kaziman in pansman dsi in zanm do boi. Pou koué la rouv Zilo dé bra ouvèr avèk konm k’i diré in sign pou la maladi déklansh son l’invazyon... Pou kossa ankor anparl anou karantène, katorzène, sèptène alé oir sa téi fonksyone pa pou vréman. Pou koué anparl anou in sirvéyans a la kilote par l’ars si sa téi marsjh pa korèktoman.

In dèrnyé zafèr : kissa i pé ésplik amoin pou koué bann ponpyé kan zot l’ariv zilo, landomin si la pa lo zour mèm zot té fine ariv dann la foré Maïdo pou étinn dofé :sa téi in bann négatif sa ?Sansa in bann pozitif ?Sansa ankor in bann ni inn ni l’ot. Zot i pé dir amoin si l’ars la pèz la plate déyèr banna pou vérifyé zot éta. Mi koné, zot i sava dir amoin I fé pa sa dann in sityasyon d’irzans.

Alé pa kroir non pli mi bate la min pou tout sak i réspèk pa lo bann mézir.Konm zot moin lé a d’mandé si sa i ansèrv kékshoz, si i ansèrv pa. Moin mèm konm zot mi koné pa arien, mé mi sava pa fé tout dann sans kontrèr par raport sak zot i di é si mi ékoute banna sé san konfyans é kan mi di kissa l’otèr, kissa la fote moin néna mon pti lidé la dsi mé san pliss.