Koméla ni parl listoir La Rényon é sa i shoke pi pèrsone, ni di lo kréol rényoné sé in lang é pèrsone i gingn pa kriz lapoplékssi, ni di nou lé rényoné é rényonèz é sa i pass konm in lète a la poste. Avan té pa konmssa : téi anparl lo patoi kréol, lo mo listoir lété réyé dann noute vokabilère, téi di pa rényoné é rényonèz. Bande ti-kolon, déssèrtin, l’avé bèss la tète, mé galman toute in klass sosyal téi viv dann la krintiv lordonans oktob 60 épi la répréssyon. Si mi diré azot in zour in bande sosyalist la fé in parti épi la apèl sa « parti socialist ile de La Réunion ». Sa i di pa zot arien mé kalkil kant mèm kossa néna la dsou.

Astèr si ni rovien in pé an aryèr dsi la disparission kaziman programé pou noute lang kréol rényoné, zot va dir amwin i rèye pa in lang dsi la karte lo monde konmsa ! Détronpe azot pars l’èr ni koze, l’ère zot l’apré lir amwin néna déssèrtènn lang apré disparète. Alor pou kossa avèk la fors la ropréssion, la fors laliénassyon, azouté avèk la korupssyon, noute lang la pa disparète. Mwin néna in lidé, mi koné pa si sé in bon lidé, mé antouléka mi di azot. Ala li la :

Pou mwin dann in promyé tan i fo ni anparl la lite global pou lotonomi porté par lo PCR dopi lané 1959 pou fère fass lassimilassyon, la ropréssyon, la koripssyon… noute bande fèr d’lanss ladan té la lite politik, la lite kiltirèl épi la lite pou l’égalité konte la mizère. Mi panss dann noute rézistanss bonpé rényoné téi rotrouv azot, pétète la majorité mé konm téi frode toute zéléksyon – dopi 1957, ziska dann zané 1970-lé difissil konète noute forss dann tan-la.

La pankor fini