Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

Kissa sa la sov noute lang kréol si èl té dann danzé ? Si la pa lo pèp rényoné par li minm – morso niméro 3

mèrkrodi 6 octob 2021, sanm Justin


Dann dézyèm morsso mwin la komanss anparl azot la lite global parti kominist la améné dann son konba pou lotonomi avèk troi fèr d’lanss : la lite politik, la lite kiltirel épi la lite sosyal po l’égalité. In légzanpe va pèrmète anou myé ésplik sa… zot i koné dann lo parti néna in sélil do baze : sa téi apèl sélil avèk in nom déyèr. Mwin lété dann sélil : Eliard Laude. In sélil l’avé in plass li té réini : lo pli souvan té la kaz in kamarade.


Li l’avé son rol politik : in rényon par moi, avèk in résponsab souvan in dirizan épi li téi réini kan l’avé in zéléksyon mé pa solman, pou in rényon piblik épi pou donn lo nom bande demoune té sava tienbo biro. Li l’avé son rol kiltirèl : prépar la fète témoignages, suiv la vante vignete, l’apéritif fin d’ané, défoi mèm téi fé sérémoni, par plass téi fé maloya dann la kour-la. In role sosyal : té la téi sign bande mossion(mi rapèl sète dsi la défanss la laïssité) é kan la mète sindika lo militan kominist téi shanj an militan sindikalist kissoi ouvriyé, kissoi plantèr. San obliye la rénion l’UFR. Kan la fé lorganizassion bande jenn kissoi l’ODJR (organisation de la jeunesse réunionnaise) mèm lo FJAR (front de la jeunesse autonomiste de La Réunion) son rényon téi fé la mèm.

Zot i oi kan mwin téi anparl azot la lite global, lété pa pou pass la pintire.

Alor forséman kan ni parl la lang épi la kiltir rényonèz dann bande sélil téi fé in gran travaye lésplikassion é téi pass ankor myé kan lété lo dirijan téi vien porte la bone parol-souvan défoi apré in séssion komité dirèktèr (santral). Alon pa obliye sé lo parti an promyé la anparl la lang (véikilère) dann son kongré l’ané 1959 alor sa l’avé son poi pou dézanklav la tète bande militan dann in parti vivan é popilère. Alon pa obliye zoinal « Témoignages » zournal politik, zournal sosyal, zoinal kiltirèl téi rante dann pliss sink mil kaze demoune momandoné. San obliye léshanj o t’an ba, ba z’an-o vi lo santralism démokratik dann parti kominis rényoné-kominis é rényoné.

La pankor fini



Inn modékri, inn ti lavi, inn komantèr ?

signaler contenu


Facebook Twitter Linkedin Google plus