Oté

Kissoi dann larzan piblik, sansa dann larzan privé, porte antansyon d’moun si wi koné la min lé a trou !

Justin / 17 mars 2021

JPEG - 43.6 ko

I paré dann tan lontan l’avé in zé kouyon pou bann moun i sava fé zot sèrviss militère. Mi koné pa si lé vré, mé lé possib, pars l’armé dann tan mwin la konu lété pa rézèrvé pou bann moun néna in bon kantité matyèr griz dann zot koko... donk, pou bien fé konprann aou koué k’sé ké kossassa, kan ou té ariv laba, téi done aou in pèle avèk in pik-mi panss pa dan tan-la l’avé déza la pèl amérikin-, i amontr aou in pti ta la tèr dann in savane épi i di aou fouye lo trou pou antèr la tèr-la.
Ou i fouye lo trou, wi mète la tère anndan mé konm i rante pa toute, i di aou rofouye in trou pou antère la tèr k’i rèst é sa sé in n’afèr k’i pé dir lontan-konm in travaye san fin bien an tandi.. Boudikonte ou lé fatigué konm in ra mor é wi aprann a méfyé d’larmé. Mé la pa sa, sak mwin té apré parl azot sé bann moun la min néna trou. Kossa sa i vé dir ? i vé dir i dépanss san konté, é momandoné i mète l’antropriz, sansa la koléktivité dann bann difikilté d’arjan.

Lo shèf ladan, d’apré sak le moun i di, sé Didier Robert prézidan la Réjyon. Kan li l’ariv mèr Tampon bann finanss la komine lété bien an orde pars lo mèr li la ranplassé lété pa tro dépansyé. An touléka li téi dépanss pa pliss ké lété possib. Donk lo bo Didier la ranplass lo mère é li la vide lo trézpor minisipal. La réjyon ossi lété bien jéré dann tan Paul Vergès, mé Didier la gingn prézidan é li la dépans san konté-sansa an kontan pa - é l’èr ki lé, lo finanss la Région lé dann difikilté. I di dann rouj mé sanm pou mwin la koulèr lé malshoizi pars bann rouj la pal o pli dépansyé.

Lo tan lé vénu pou li alé in n’ote koté. Li la sèye gingn la prézidanss Cinord mé la koup la manké.. Zordi néna in bonpé i vé gingn prézidan La réjyon. Lé bon lo lanbissyon, mé kalkil bien kossa zot i vé fèr. Pétète zot nora gran-gran projé é la koléktivité o-flan pou réalizé... Porte antansyon lo boug, son min lé a trou.