A s’ki paré so kou issi sé parti répiblikin la gagné : Donald Trump la gingn Prézidan, épi son parti la gingn la mazorité dann kongré épi dann Sénat… Aprésa néna in kantité pti zélékssion, épi référandome é pou konète toussala dizon i fo ou lé éspéssyalist zétazini.

Na pwin lontan mwin la ékrir in oté pou dir sak va gagné va gagné é dak va pèrde va pèrde, mé i shanj ar pa gan-shoz dsi la planéte par rapor sak i pouré shanjé... Si ni pran la pé dan lo monde ; si ni pran la lite konte léfé d’sèr, si ni pran la lite konte la mizèr, épi lo krime organizé é d’ote gran probleme ankor ankor in gran péi konmsa néna moiyin pou règ bann probèm mé la pa lo kadé son soussi kissoi in parti kissoi l’ote.

Inn-dé késtyon sinp : kossa i sava fé avèk lo blokiss konte Cuba ? Kissa i sava lèv sa ? A mwinss in mirake mi oi pa. Kossa i sava fé pou arète lo massak bann paléstinien ? Sirman arien sof si banna i trouv zot solission par zot mèm. La vi shèr ? Bann démokrate la pa règ sa, bann répiblikin va réglé zot ? Arien ditou.

Astèr si ni rogarde bien, néna dé shoz i rogarde pa lo gouvernman mé lo konplèks militaro-indistriyèl é si la guèr nikléèr i pète in zour sar pa par in prézidan mé par bann kapitalist i fé zot bèr la dsi é dir k-i apèl sa la démokrassi !É dir k’i apèl sa lo pli gran sistèm démokratik.

Antouléka d’issi épi dann la vi bann pèp sé kékshoz k’i oi pa.

A bon antandèr salu !

Justin