Oté

Kite Tampon a sèk, pou pran konsèye réjyonal a flo-morso niméro 2

Justin / 12 désanm 2019

JPEG - 43.6 ko

Néna in kozman i di konmsa i sort pa la polis pou vni gard shanpète sak i vé dir kan ou i fé in n’afèr la pa pou désann mé pou monté. Kozman-la mésyé Didier téi koné ali bien é dsi l’ bout lo doi. Donk si li la sort Tampon pou vni prézidan konsèye réjyonal lété pa pou bèss an grade mé pou monté é pou monté, li la monté avèk kou d’min téi sort partou, in pé par trétriz, in pé par partizaneri, an mizan dsi son zén èss épi avèk pou poinn vizé sak in pé téi apèl dann tan, lo trézor konsèye réjyonal.

Lé vré Paul Vergès l’avé si tèlman bien amenn son bark ké désèrtin téi pans lété konmsi li l’avé trouv trézor. Boudikont li l’avé pa trouv trézor pou d’bon mé l’avé, dann tan-la si tèlmann shoz pou fèr épi si tèlman moiyin pou moiyéné ké pou désèrtin gro profitèr sa téi fé l’èr in trézor téi rèss arienk pou trapé épi partazé.! Dabor l’avé la késtyonn rout litoral é konsèye réjyional téi vé pa pran sa dann l’éta ké li lété é li téi domann l’éta pou romète la rout a nivo, é li téi an profite de sa pou rofé lo trin-tram train si zot i vé - mé sa lété kékshoz téi vo plis in milyar, in milyar sink san milyon par la.

Sé dir azot kan Didier Robert, épi son bann konpagni téi antann parl de sa si la boush téi komans pa salivé-fé d’lo si zot i vé ! Mé li téi oi ankor pli gran : li téi kalkil la rout sis voi, li téi oi ankor lo dé mil bus, in nouvo l’aéropor, la rout Lé Plaines, étsétéri-étsétéra.. An pliské sa, mazine in kou lo bann votour téi antour ali, kosa zot téi pans dann zot fonnkèr. L’avé poi n arienk sa vi ké dann tan konsèy réjyonal lété kaziman in boite a idé avèk si tèlman prozé an kantité avèk lo larzan k’i sava ansanm pou fé.

Fransh vérité mon bann dalone, mon bann dalon, si konsèye réjyonal l’avé gingn kontinyé son bann prozé ni pé dir La Rényon nora vréman shanj figir, é Didier épi son l’antouraz pintad l’avé bien konpri sa biznèss an pliss é biznèss-la désèrtin téi pans sa téi doi raport aot lo voul-finalman té zot téi pans zot téi sava mète la min dsi in trézor., mèm si pou sa téi fo sort Tampon a sèk pou bvni konsèye réjyonal a flo.