I paré dann la répiblik fransèz néna dis mil sink san pèrsone lé klasé S. Sa i vé dir zot i pé ète, in zour, danzéré pou la sékirité d’moun. Dismil sink san, la pa bokou, mé i pé dir osi sa in bann moun i pé fé déga. La prèv ? An parmi bann moun la fé z’atanta l’avé désèrtin té klasé S. Isi osi La Rényon noré d’apré sak bann z’otorité i déklar kék dizène de moun lé klasé konmsa.

Kosa i fé avèk banna si la poin arien pou arprosh azot koméla ? Pars klasé S, sa i vé dir na poin arien pou roprosh aou. Alors, i fo sirvèy azot mé la poin in polisyé éspésyal pou mète déyèr shakinn, zour konm nuite… Pou Sarkozy i fo rouv in kan pou mète tousa d’moun dedan. In kan pou dis mil pèrsone, alé oir dan La Frans bann prizon lé dann in drol d’éta, i mank la plas, é soi sé bann moun an prévansyon pou kékshoz l’arivé pou vréman, soi zot lé déza kondané. Donk nana in bon rézon pou anfèrm azot !

Dis mil pèrsone : ok ! Mé kisa i di si moin, toué, li, l’ot la-ba, nou lé pa klasé konmsa. Pars kan ou lé la-dan ou i koné pa. I anons pa ou sa par lète rokomandé avèk AR. Sak i pé fèr sé in gran matin i vien kass out port, i fouy dann out l’ordinatèr, i fé pèr out zanfan é aprésa out bann voizin i gard aou an dsou. Alé, aprésa fèr fas lo rogar d’moun !

Lé vré ké pou sèrtin i vo myé prévnir ké guérir ! Problèm, bann rényoné sinploman rézistan, i koné lo gou in politik sirvéyans é la réprésyon. Alor i vo myé prévnir ké guérir, sa i poz in bon politik ransègnman avèk lo risk ké kan lo Jihadism sar fine étinn, so kou isi i rotourn kont sak i aksèp pa in politik l’asimilasyon, lo l’intégrasyon é la politik néo-kolonyal. Nou lé fine déza oir sa é ni souète pa ankor in foi, i fé anou in pti dann do.