Nou la shanss lire dann zoinal témoignages - in patrimoine par li mèm -, Kabary Malagasy épi Moutya séséloi lété klassé konm patrimoine imatèryèl limanité. Néna kék tan ni rapèl ossi klassman tanbour shagossien épi tanbour rodrigué. Issi mèm la Rényon nout maloya lété klassé konm patrimoine limanité.

Sa sé dé zafère inportan é mi kash pa d’dir kan la klass lo maloya, sa la fé plézir amwin bonpé. Pou kossa mi di sa ? Pars mi souvien lo tan maloya téi zoué dann la kour d’moune é sinploman dann la kour d’moune. Mi rapèl ossi lo tan maloya lété kaziman défandi parète an piblik é pou sak i koné pa mi rapèl azot Serge Sinamalé épi Claude Allier militan sindika la gingn l’annuiman avèk la loi pars zot la zoué maloya dsi la plaze dan louèst La Rényon.

Mwin té kontan galman pars sé la MCUR avan in pé i fé disparète ali ké la fé lo gro travaye k’i falé fé pou prézante lo dossyé dovan l’Unesco… Kan sa i ariv in péi, kan sa i ariv in pèp sa lé vréman kékshoz gayar.

Astèr ni doi poze anou in késtyon inportan : kossa i fé astère ? Kossa i fé pou konsèrvé, kossa i fé pou dévlopé, kossa i fé pou konsèrv son karaktèr tradisyonèl, épi lo lien avèk nout listoir : sète bande zésklav, sète bande zangazé… kossa ni fé ? Kèl moiyin ni mète ladan ? Kèl moiyin ni domande l’Unesco, l’éta fransé épi bande zinstitissyon pou donn pliss la valère ankor noute patrimoine, viv sa dann kère bande zénérassion a vnir.

Mwin la pa antande parl konkour maloya. Mwin la pa antande formasyon maloya. Kan mi sava perde in pé mon tan dann soiré dansante mi romark kan i zoué maloya, in minorité i rante dan la danss é in mazorité i rogarde, i ékoute, i look ali.

Kontinyé konmsa é nora pi ! Kontinyé konmsa é apré parl amwin ankor maloya konm patrimoine… osinonsa patrimoine an pèrdission.

Justin