Oté

Ko-dévlopman oui moin lé pour mé a kondisyon…

Justin / 5 zwiyé 2018

JPEG - 43.6 ko

Na poin lontan moin la lir dann zournal épi moin la vi galman dann télé la COI (komisyon loséan indien) banna la mont in prozé ou fé ropoz dsi zépol bann malgash lo soin nouri tout lé z’ot péi i fé parti la COI. Mé zami, moin la trouv sa drol !
Pou kosa zot va dir amoin ? Pars, mi koné in kozman, lé pou moin près in rolijyon : kont pad si baton tonton (in pé i di bato) pou travètrs la rivyèr. Pars si nout tout i kont dsi Mada pou gingn nout ri, nout mayi, nout luil, nout vyann épi dizon tout lo pli nésésèr pou demoun viv-mèm sirviv - mi di sa lé riské.
Riské pou kosa ? Pars zordi Madégaskar i produi pa asé lo viv pou son popilasyon é li néna vin-sink milyon d’moun é l’ané 2050 li nora sinkant milyonn pèrsone é zour-la mi pans zot lé riskab ète ankor moins dann l’oto-sifizans, sansa la sékirité alimantèr. Parl pi, si lo péi i dévlop é li dovré dévlopé. Si nivo d’vi son popilasyon i goumant é li dovré dévlopé.L’èrla, mon kozman anlèrla lé ankor pli valab.
Riské pou kosa ankor ? Pars si néna in dézord dann lo péi. Si néna konm k’i diré in kou d’éta, sansa in dézord dann la sosyété é si bann malgash néna z’ot nésésèra rienk pou zot, sré normal zot i ansèrv azot an promyé é lé zot apré.
Riské pou kosa ankor ? Mé zami, rogard la plas Madégaskar dann l’oséan indien. Dizon li lé plasé dannsid-sidouès, nor-norést é i diré li vé bar la rout siklone. Mé siklone i kass pa la tète pou sa, li avans konm in rouo… li kraz tout dsi son pasaz : do ri, mayi, é d’ot komodité i fé pa in parade koté li. Mi vé pa ète in zoizo mové zogir, mé so bann moun la COi i dovré fé travaye in pé z’ot koko.

Donk, sanm pou moin kodévlopman sé in bon n’afèr-kékshoz nésésèr pou nou. Kodévlopman avèk Madégaskar moin lé pour é mi oi pa-sof si nout koko la bloké - pou kosa ni rofizré lo kodévlopman avèk Mada.
Sésak i fé dir amoin : kodévlopman oui, san foi oui, mé a kondisyon…