Oplis i sava, oplis gouvèrnman i piétine déssi nout libèrté. Biensir : pou nout bien... Sé pou roganiz nout lavnir, pou in bon jèstion la Frans, pou suiv si la mashine l’État i marsh konm k’i fo... Kissa i pé dir li vé pa l’Éta nana bon shif pou li bien travay ?

Dèrnié z’afèr mi sort lir, sé in z’istoir d’fishié pou bann zélèv : pou dir si li vien lékol normalman ou sansa, si li lé in pé absan, si li la shanj klass l’az k’i fo, si li la gingn son légzamin, si l’ariv ali in kanikrosh èk lo mètr, sinon in n’ot marmay. Konmsa, minist l’édikasion nasional va gingn suiv si tout i roul ron pou l’édikasion nasional.

Solman pou sa ?!!! É lo rèst. Lo marmay nora in niméro nasional. Sa va suiv ali partou... Alor zot i pé dir amoin k’in zour, i sava pa rogard son dossié, kisoi pou rant dann in bon lékol, kisoi pou pas in bon diplôme, kisoi pou shoizir rant dé jène pou in travay. Si l’ariv lo famiy in dézagréman avèk la loi ? I sar arpa rogard dossié son zanfan pou arprosh ali !

Dann la tèt demoun na lo pouvoir, koméla, na plis viss ké lizine Boi-Rouj : zot i pass z’ot tan pou poz pièz pou pli dvan... Lé ga ! Antansion, bann fishié linforlatik-la, i pé fé mové z’afèr èk sa :
san farsé : zanfan kodbaré, zanfan mal baré ! N’a artouvé !

Justin