Mézami dann tan, partou, kissoi dan la vil osinonsa dann la kanpagn téi antan kok shanté, mwin la zamé antann dir kok i kass somèye kélk’in. Pou mwin té in plézir antann kok shanté.

Koméla, lé shoz i marsh pi konmsa ; bonpé d’moune i s’plègn pars kok i déranz azot. Laba dan La Franss la pass ziska in prossé pou in nafèr konmsa.

Mi yèmré ziska, in zour, i mète lo shan kok dann patrimoine imatèryèl limanité, tèl fasson ké dmoune i fini par réspèkt los hanté bann kok. Pou koué ? Pars, sanb pou mwin sa i fé parti noute patrimoine an danzé.

Alé ! Mi kite azot rofléshir la dsi é ni rotrouv pli dvan, sipétadyé.

Justin