Oté

Koli dann tan lontan, lété kékshoz mi pé dir azot !

Justin / 16 zanvié 2021

JPEG - 43.6 ko

Mézami, mwin la konète lo tan la komanss anvoye frui La franss laba. Mi koné pa kissa la di sa nout momon, mé la di k’i pé anvoye lo frui an franss mé i fo ou lé ékipé : i fo lo frui, i fo tante pou mète dodan, i fo ankor in zéguiy sak épi la fisèl-i fo péyé galman épi alé sind-ni pou fé lo léspédisyon.

Donk in samdi momon la di amwin épi mon frèr alé anvoye koli frui pou nout dé pli gran frèr téi fé zétids dan La franss. Nou la sort Sint-klotid épi nou la dsann a pyé. Nou la fé la ké, é aprésa l’ariv nout tour ; mé nou lété in pé koinssé. Mon frèr la trouv lo madam nout voizine téi okip in pé tro son léspass vital. Alor li la trap par la mansh lo tante té atèr pou mète dsi kontoir : lété la manyèr pou li d’ète trankil. Mé oila kan li la ral lo tant otèr kontoir oila ké lo rob a flèr lo madam la vni avèk.. Si lo zyé madam-la lété fiziy, mon frèr té mor, pétète mwin ossi pars la zète a amwin ossi in rogar noir avèk son zyé révolvèr. Mon frèr la dépoz lo tante atèr épi in néstan apré li la rokomanss lo manèj. Ral in péson koté lo tant é kan li la éstime lo lékar té sifizan li la lèv lo tant mé kan lo tant l’ariv otèr kontoir, ala ké lo rob a flèr téi kouvèr ankor la tant Mon frèr la ardépoz son tante épi la pi bouzé, mwin ossi mwin la pi bouzé.

Kan lété fini lo léspédisyon, é ké l’afèr té bien konfyé Air-France nou la romont Sint-klotild an kar kouran d’èr. Mon frèr la mète lo zéguiy sak dann son posh kilote é nou la rant dann kar kouran d’èr. Nou té séré ladan mél o voiyaz la bien passé. Arriv la déssante, lo dèrnyé voiyajèr la shap atèr avèk mon frèr konm si lé dé té agrafé ansanm. Lo boug la di : « Oté malbar kossa la pou pik amwin konmsa ? Kossa néna dann out posh ? ». Mon frèr la fé konm « o lé min » éla di : « Arien ! arien ! ».lo kar la parti, lo boug la rant an vitèss dann son kar éla nou la vi lo zéguiy sak téi dépass in bon boute la posh kilote mon frèr. Nou la pète a rir ! Kossa i fé dann in ka konmsa.

Apré nou la mont la kaz, nou la done momon bone nouvèl. Kinz zour apré nou la gingn in lète pou di la tante frui l’avé bien arivé. Nou té kontan, sa i fé in léspèryanss, nou la fé arienk in kou. Ni artrouv pli d’van, sipétadyé. Koli dann tan lontan ? Mi obli ar pa ou.