Zordi 30 oktob, la-ba dann Por-Loui, bann Chagosien i fé la rouvèrtir in kolok dsi lavnir bann zil Chagos épi lo rotour bann Chagosien dann bann zil-là. Zot i atann la partisipasyon in bonpé pèrsonalité avèk in mèm idéal : lo rotour bann Chagosien shé zot. In shé zot lé interdi azot alé, lé intèrdi résté, lé intèrdi travay pars na in pé plis karant zané, gouvèrman zanglé épi gouvèrnman zamérikin la désid intèrdi azot viv dan zot péi, é la mèt azot déor par la fors épi par la malis, pou zot alé konm zémigré dann in bann péi zot té i koné mèm pa : Sésèl, Moris, é pli loin ankor, dan Langlétèr.
Pou kosa ? Pars bann zamérikin la désid fé dan lil Diégo Garcia in gran baz militèr, lo pli gran baz bann zamérikin nana dann péi étranj. Mé sa in zésplikasyon sa ? Kan ou i koné lil Salomon épi Perhos Banos lé loinn Diégo... plis dé san kilomèt, konm Moris par rapor La Rényon, é pèrsone i oi pa kosa dé-troi mil moun pasifik lé kapab fé kont lo péi lo pli puisan nana dsi la tèr. Donk, sa la pa in zésplikasyon valab, sa in rézonman tèt dir, in rézonman koko boushé. Sa in nafèr i tienbo pa d’bout, é bann zanglé i komans konprann sa la pa in nafèr séryé. Sé pou sa gouvèrnman zanglé la anvoy in délégasyon koz avèk bann Shagosien pou oir si zot i vé vréman rotourn shé zot, é koman zot i vé rotourn shé zot.
Sé pou sa bann Chagosien la désid fé in gran kolok avèk in bann zatélyé pou aport la répons. In gran kolok avèk konm poinn vizé la roganizasyon lo rotour zot pèp dan zot péi... Mi pans i fo ni bat la min pou zot kouraj. Mi pans i fo ni bat la min pou zot kapasité pou réazir é pou profit tout bann kontradiksyon rant Langlétèr épi Lamérik, rant bann zamérikin zot mèm, épi bann zanglé... In pti koin an fèr i nyabou fé pèt in gro tron d’boi si li lé bien plasé.

 Justin