Oté

Kolonyalis la sort par la port pou myé rant par la fénète !

Justin / 7 séptanm 2018

JPEG - 43.6 ko

Matant zélida la ékrir Justin :
Mon shèr nové, mon spès salté rouj-de-fon dovan l’étèrnité m’a dir aou franshman z’ot manyèr anparl toultan kolonyalis, ébin mi doi dir azot sa sé in n’afèr i komans fatig amoin. Fran cfa ? Kolonyalis. Kopérasyon ? Kolonyalis ! Misyon imanitèr ? Kolonyalis ! Kan lé pi lo kolonyalis sé lo néokolonyalis so kou isi. Pou ma par, mi trouv bann puisans kolonyal konm La Frans, l’Anglétèr, épi d’ot ankor la bien ède bann z’ansien koloni pou zot alé pli d’van dann sans lo progré. Donk, si bann z’ansien koloni la pa tir lo bon parti avèk l’ède zot la gagné, avèk z’ot libèrté rotrouvé sé z’ot fote azot é pa sète bann z’ansien péi kolonyal. Tok ! Pran sa pou toué !

Justin la fé pou répons :
Mon vyé matant k’i koz touzour la boush rouvèr, mi yèm bien out fason alé dann sans bann z’idé dominant. Pou in bone rézon : lé pli fasil suiv lo kouran an dsandan plito ké romont ali.
Zistoman matant, mi pans ou lé o kouran lo prosé i éspas laba La Haye : sa in prosé Maurice kont L’Anglétèr é avèk sa bann mové trètman bann chagosien la sibi. Ebin, matant bann zavoka épi la plipar bann roprézantan bann péi-an touléka, in for majorité - i parl in dékolonizasyon pa ashové [1]. Matant si néna inn an parmi bann prinsip dann la dékolonizasyon bann puisans kolonyal téi doi réspéktété : téi falé pa tir in bout dsi lo téritoir bann koloni. Téi falé pa é sa sé in prinsip lo droi internasyonal.
Poitan kosa L’Anglétèr la fé ? Li la fé in nouvo koloni dann l’oséan indien i apèl lo BIOT si tèlman li la sépar bannzil Chagos par raport l’il Maurice. Romark La Frans la fé parèye, mé La Frans sé lo shèf an parmi bann vyolèr la dékolonizasyon. Sa ni koné !
Si i arzout avèk sa lo droi bann pèp pou désid zot mèm z’ot l’avnir ni konpran tout suit bann puisans kolonyal la zamé rode pou vréman dékoloniz bann péi z’ot l’avé karsèr lo libèrté épi lo bien épi ankor lo patrimoine. Dizon, zot la sort par la port pou rant par la fénète.

[1Bann z’anglé la di néna in konfli téritoir rant L’Anglétèr é l’il Moris donk lo tribinal La Haye lé pa konpétan mé d’ot la di é sa lé pli vré sé in mové aplikasyon lo prinsip la dékolonizasyon é sa sé lo pli vré lo tribinal lé bien konpétan.