Lané i tard pa pou fini. Sak navé linpo pou péyé i tash moiyin péyé.Noël, zourdlan i ariv inn déyèr l’ot.I fo mazine kado pou marmay épi pou granmoun.Vakans ankor, i fo trouv larzan pou donn marmay manzé matin konm soir. Pli d’inn lo posh na trou, pli d’inn i koné pa koman i sava fèr pou pèy tout sak nana pou ashté.

Alor kréol i komans divizé : inn i di, bann érémi lé pli éré ké zot, akoz érémi i gingn la prime. L’ot i di rienk troizièm az nana la shans. Zot i travay pa pou in grin, sé lo moun ki travay i fé viv azot.

D’ot i di, guèt pa nou kan mèm nou lé fonksionèr, kroi pa nana l’or dann nout zorié. In bon pé i tonm sü la boss bann maoré avèk bann komorien : banna mèm nana tout défo. Par zot fot si nou lé o flan.
In kalité dmoun i tap sü lot kalité. Sakinn i rod par la fot kisa dann zot posh na trou.

Gouvèrnman i pé èt kontan*, li ki ginye tronp anou. Nou lé divizé.
Mazine in kou, in boksèr i sava konbat, in poin anmaré dann do ? Son kokman lé asuré. Si nou diviz anou, nou lé kom boksèr-la.
Donk, i fo nü arèt diviz anou, nï rod sak lé bon pou nou, épi nou mèn la lüt.

Justin

*diviser pour régner, un principe de gouvernement réactionnaire.