Dopi inndé zour, in dalon i fini pi fatig mon koko d’tét èk son kozman d’si la loi intitisionél mésyé Macron i vé fé apliké. Li la pa dakor ék sa, li manz la raz. Moin la pér ziska, pangar son tansion lé riskab i grinp tro. Pou sakinn i konpran byin akoz mon dalon lé an shalèr, ma fé pou zot in lékléraz :

Zordi, an Frans néna 577 dépité èk 348 sénatèr. Sa i fé in bazar global de 925 parlmantér. I di in parlmantèr, sé t’in dépans prés 1milion d’éro par an. Si ni fé in pti kalkil, sa i fé in takon dépans larzan vréman. Kom lo péi lé inpé si l’ki, Makron la trouv in fion pou gob in bon moné, rotrémandi pou fé zékonomi. Li la désid fé sot 30 % bann parlmantèr kan v’ariv proshin zéleksion : olèrk 925 nora donk 648. Sa i vé dir osi , pou la Rénion, nou nora pi 11 parlmantèr, mé sélman 7 sansa 8. In dépans 3 milion déro an moins. Otan dir, pou in bann, sé kom in zarèt la mori an travèr d’gozié. Alala koman lo zafèr i prézant. Astèr désertin i di, lé vré, néna inpé tro dépité, in pé tro sénatèr, i fo ratiboizé. D’ot i di lo kontrèr : oplis néna, oplis lé méyèr. Sa in gran déba sa !

Mé mi pans mon dalon néna tor fé la fièv pou sa zordi, akoz lo zafèr la pokor kui, la pokor soubatkoz sa dovan lo l’asanblé, la pokor voté. Mé mim tan, mi trouv ké li lé in sakré farsèr, li koné pa, li koné pi kosa li vé. Li na kom in servél moino. Mi ansouvyin, na poin tro lontan d’sa, li té an parmi bann té pou kri for : néna tro parlmantér , banna i foute aryin, sé t’in bann bézèr d’paké, zot i gingn tro larzan, i fo koup inpé, é patati patata.

Alala astèr, li la fine trok palto. Anplis ké sa, li vyin kass mon zorèy. Li fé ri mon boush, mé mi koné li lé pa tousèl lo pov, pou vir kazak , kan sa i aranz à zot. Mé li sé mon dalon mim. Kan son fièv i sora fine tonbé, m’a koz ék li pou d’bon pou bien konprann sak i ariv ali zordi, pou bien konprann pou kosa li néna, konm moin la di, in zarète mori a travèr d’gozyé.