Matante Zélida la ékrir Justin :
Mon shèr nové, mon spès salté,
Konm mi konpran la, zot, bann gosh, zot lété dakor arienk pou fé pèrd lo pti prézidan. Inn foi k’sa la fini, ala k’zot i batay konm lo shien avèk lo shat. Mé so kou isi, moin lé près sir i sa rash lo dan bann rouj-de-fon pars moin lé sir é sèrtin, lo nouvo prézidan-la, li sava pa fé plézir bann rouj pou déplézir bann roz. Lo zo i soutien la shèr, kant mèm ! Tout fason, dépi 2010, bann roz épi bann blé la fine tonm dakor. Kaziman in maryaz déyèr la kuizine. Donk, zot i vé, zot i vé pa, sar konmsa é pa otroman. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Si ou té i égzis pa, nora fali invant aou ! Pars, konm mi konpran la, ou l’apré suiv l’aktyalité é ou i rolèv, tout poin, ou i pans, lé marké kont nout parti ? Bin, m’a dir aou, fransh vérité, mon Parti kominis i kroi pa Pèr-noèl. Li koné désèrtin dirizan bann sosyalis péi par kèr... Sé pou sa nout parti i baz pa tro dsi zot, mé i baz dsi lo Parti sosyalis la-ba dan la Frans, épi isi dsi bann z’éléktèr rényoné. Nou, ni pans, afors éspliké, san dékourazé, demoun va fini par konprann nout pozisyon la pa in kours pou trap manda, mé in kours pou trouv in bon solisyon pou nout péi. Nana san in départman dan la Frans, épi nana plis in vintène réjyon, arienk La Rényon — in départman é pi in réjyon — in parti la propoz in plan dévlopman. An plis ké sa, la propoz sa konm in kontra lo nouvo prézidan. Nout résponsabilité lé gran, sé anou d’aport la prèv lo pèp rényoné lé dakor avèk nou. Koman sa ? I fo ni gingn in bon rézilta z’éléksyon k’i vien. Tok ! Pran sa pou ou !

NB : Lo prézidan Hollande la di, kan li pran in l’angazman, li réspèk. Tardra, viendra, nou va suiv sa do pré !

 Justin