A forstan lo tan la fini par done anou rézon é toute sak la anvoye anou baladé la romarke zot ane lé té inn bourik é arien an plisské sa… Zordi midi dsi télé rényon la fé in déba rante in prézidan lassossysion paran épi in moune lo snalc — pa lo pli progressist ké néna — é wala ké lo sindikaliss i réklame la klime toutsuite pou toute lékol konmsa bann marmaye sar pa in zénérassion salkrifyé.

Mi yèm bien so zistoir d’zénérassion sakrifyé mé mi domann si sé arienk koméla i fo anparl sa sansa si noré pa falu ansèrv sa dopi in bon kantité d’zané, pétète mèm dopi bann zané soissante. San fèr in déssin ni koné toute bann zanfan lédikassion nassyonal la lèss dsi lob or shomin pou toute sorte kalité rézon konm kan la rofiz fé rante kréol dann lékol, konm kan la rofiz lo l’ané klimatik, konm bann viktime l’inégalité épi lo shomaj sa konté la mizèr épi la povrété.

Mi sava pa é lo bilan mé mi assir azot lo bilan lé pa bon ditou mé wala déssèrtin i sava sov bann zénérassion avèk la klim partou toutsuite é mèm si lé pa possib i pé kan mèm dir… Konbien l’avé bann zintéléktyèl apré dir kan Paul Vergès téi signal lo réshofman klimatik touziss téidi pa noute kamarade la tète i déblok. Mé pou roprann in kozman noute kamarade Paul : la vérité lé tétu é drolman tétu siouplé.

Alé ! Kontinyé anparl la klime san anparl l’ané skolèr klimatik é nou va oir kossa ksé k’kossassa. A bon antandèr salu !

Justin