Na poin lontan l’ariv in gran batay la sours Sinni. Dé sèrtin moun la mark sü in mïr : « malgash, zorèy, komor, bachelier déor ! ». Mi koné pa si té in provokasion, si té in kasaj ti-boi, sansa si lété séryë mèm. Dann prëmié, konm dann dëzyèm ka, la pa la pèn kozé sinon pou fé bat la lang. Dann troizièm ka, lé pli séryië.

Mi di an moin mèm, lo moun, sansa lo bann moun la mark sa té i vë anvoy in méssaj. Pétèt, zot i majine lo bann moun étranj avèk lo bann moun kalifyé lé riskab pouss azot dann fon, ponp zot l’èr, pran zot plas. Pétèt zot i majine, zot sar pi shé zot épï zot i trouvar pi in plass pou pozé par la fot lé z’ot.
Sansa, zot i kri pou di : « Gard koma zot lé tou sèl, mèm si zot lé in bon pé ! ». Spandan, oubli pa, moin konm in bonpé dmoun issi, nou sé zanbrokal la ras : nout z’ansèt i sort in pé partou, souvan z’ot l’ariv forsé, zésklav li, zangajé li, kondané li, fanm dézord li...

Esploité konm nou lété ou bien konm nou lé, mizèr konm nou lété ou bien konm nou lé, banna i ariv... Dalon, nou majine mèm pa koman banna sé nout frèr, sé nout sèr, sé nout kouzin, nout kouzine.
Nou majine mèm pa koman banna lé konm nou.

Justin