Oté

Koman Emé la vni rish arienk avèk son shat - promyé morso

Justin / 24 out 2019

JPEG - 43.6 ko

L’avé inn foi pou inn bone foi mésyé lo foi, la manz son foi avèk in grinnsèl.
Dann tan mon zistoir i éspass l’avé in famiy mizèr vèye pa koman : Lo papa lété vyé épi lété malad. Son madam étan mor, son troi garson téi ède ali pou gingn zis a pène son soso. Lo troi garson téi yèm bien zot papa é zot l’avé pèr k’in zour par laz é par la maladi, zot vyé papa i arète avèk la vi é kan li la tonm malad zot la konpri son fin d’vi lété pa troloin. lo papa la fé vni son troi zanfan épi li la di azot :
Kriké ! Kraké ! Kriké Mésyé ! Kraké madam !

Mon troi garson, moin néna kékshoz pou di azot zordi mèm, pars sak moin néna pou dir i pé pa atann pli lontan. La nui pasé moin la rèv Bondyé la désid ramenn amoin koté li donk fé kite amoin la tèr épi alé dann son roiyome… Mon vyé famiy, koméla la fine désote la vi, l’avé di amoin néna lontan, dann tan zot lété dan la vi, kan Bondyé i vien la nuite pou dir aou sa, i rèss pi in bonpé d’tan pou viv. Konm moin néna poin in ta lo bien, mi vé partaz rant zot lo pti trépé avan mi pète lof.
Zot i koné moin néna in moulin mayi pou moud mayi d’moun, in bourik pou alé shèrch mayi la kaz demoun épi ramenn mayi mouli shé d’moun, in shat noir lo zyé vif, lo kor élastik, épi adroi, kaziman in l’akrobate, pou trap lo ra, souri épi kaméléon, san konté tout kalité zoizo l’avé ankor avan isi La Rényon é mèm lo ni zoizo avèk lo zèf dodan.
Mi vé partaz mon bien rant zot troi : mon promyé garson, mi done ali lo moulin an pyèr, mon dézyèm mi done ali lo bourik konmsa inn é l’ot va gingn viv épi travaye ansanm. Mon troizyèm zanfan sak i apèl Emé, m’a donn aou mon shat é avèk sa ou va rann demoun sèrvis é l’moun va rékonpans aou. Tout fason ozot troi va rèss dann mon vyé boukan an atandan zot fé in bon parkour do vi.
Kriké ! Kraké ! Kriké Mésyé ! Kraké Madam !

Dan la nuite d’apré lo moulèr mayi i mor é mi pé dir azot lo troi zanfan lété pa kontan ditou é zot té i anvizaz la vi avèk tristèss : la mizèr d’apré zot i sava mont dsi zot konm karapate dsi tété bèf mèg. Lo pli malkontan lété Emé pars si li téi antrovoi koman son bann frèr téi pé gingn z’ot soso prèss konm k’i fo, li téi oi pa ditou son l’avnir ali an roz. Kosa li sar fé avèk in shate ? Toulmoun l’avé lo shate é li l’avé zamé antann dir demoun téi pèye lo shat pou trap lo ra dann zot kaz épi souri épi mèm kamaléon dann bitasyon.
Koton mayi i koul ! rosh i flote ! l’avé inn foi, pou inn bone oi mésyé lo foi la manz son foi avèk in grinnsèl

Promyé morso la fini-samdi proshin zot va lir dézyèm bout.