Oté

Koman émé troizyèm garson moulèr mayi la vni rish avèk son shate-troizyèm morso.

Justin / 7 septembre 2019

JPEG - 43.6 ko

Dèrnyé foi nou la vi koman lo shat la parti trap lyèv pou lo Roi épi lo roi koman lété kontan é la bien rékonpans lo shate an dizan ali : « Fé bien konpliman vot mètr é di ali son souvrin sar bien onoré si in zour li vien rann in pti vizite lo palé. »

.Kan lo shat l’arivé lo dé promyé frèr lété fine manzé é konm dabitid san done arien z’ot frèr.Mé kan zot la vi barkète téi sort palé roiyal, tèlman sa lété zoli, tèlman sa téi san bon zot la bav zot tousèl, sirtou ké la pa done azot arien non pli so foi isi.

L’avé inn foi, pou innn bone foi, mésyé lo foi, la manz son foi avèk in grinnsèl !

Tazantan lo shate téi sava palé roiyal épi li té i amenn in zibyé li la trapé sansa défoi li la volé mé li vien pat ou lé zour pars zot i koné sa té riskab tro atir latansyon lo roi é sète-la té kapab dir :  »Kosa sa i vé ankor avèk zot bann kado san arété ?Tro zoli pou ète poli »-ala pou kosa lo shate téi savalo alé in foi rant-rant..In matin li ariv koté la rivyèrSin-Zan, li oi demoun apré péshé :in pé apré trap boushron, in pé apré trap shovrète gran pate, in pé galman l’apré souk poisson blan pars dann tan mi di azot-la, l’avé, l’avé poisson dann la rivyèr Sin-Jan é pa faroush, fasil pou trapé.Lo shate i ropèr in péshèr, méyèr péshèr l’avé dann l’androi : li trap li trap li trap san zaré.Lo shate i tonm épi i fé lo mor.Lo péshèr i oi lo sak bien konfor,li pran pou li – pou li mète son bann priz dodan.lo shate i fé lo mor.Mé momandoné li oi lo sak lé kazman plin.Li lèv an san toush, li sé d’trapé lo sak , parti, kouri.Mi kroi pa si ann kourèr san mète n’arté kapab souk ali.

Kriké ! Kraké ! Kriké Mésyé ! Kraké Madam !

Lo shate i sava palé lo roi épi li rant dann palé.Konm banna i koné ali, i lèss ali rantré.Lo roi i rosoi ali, é lé kontan, lé fyèr par raport la kantité poisson, shovrète, kamaron, boush-ron néna dann sak –la.Parèye shak foi :son gran trézoryé i donn plizyèr pyès larzan lo shate épi li sava dann la kuizine pou trap son ropa barkète épi lo roi i di :

« Shate, di bien mèrsi out mètr, é fé ali bien konpliman.Di ali in zour lo roi va vni oir ali.Dayèr landomin li doi fé in karé koté Kartyé fransé laba, si mésir Émé lé la, lo roi sar kontan fé sa konèstatir-sa konésans si zot i vé. »

Arivé dann kalbanon moulèr mayi, mèm sénaryo :lo shate i donn bann pyès son mète-néna déza in bon moné ramasé la !- épi lé dé i asiz i manz manzé barkète.Lo dé frèr la bav i koul mé i done pa zot arien.

Apré lo shate i di avèk son mètr : « Mon mètr, mon mètr ! domin lo roi i sava vni avèk son karos é tout in konpagni pou rann aou vizite.Si ou i ékout amoin bien, out fortine lé fète ! »

Émé néna bien l’intansyon ékout son shate pars ziska zordi li la poin pou s’plinn pars lo shat é sa lé vré lé désidé fé son fortine.

Koton mayi i koul ! rosh i flote ! L’avé inn foi pou inn bone fo, mésyé lo foi la manz son foi avèk in ginnsèl.- troizyèm morso la fini, samdi proshin zot va lir lo katriyèm boute.