Oté

Koman ète lo méyèr dann in sistèm konmsa

Justin / 17 févrié 2020

JPEG - 43.6 ko

Mé zami, mi rapèl, dann tan lontan nou l’avé in vyé garaj avèk dodan in kantité zoinal té fine déglingé. Ladan téi trouv bann zoinal parti kominis fransé sansa aproshan. L’avé frans nouvèl, l’avé l’imanité, l’avé ankor miroir ésprint-in zournal léspor - L’avé osi Vaillant pou nou marmaye. Anfin an tan k’kominis nou lété plito ékipé.L’avé osi Témoignages épi d’ot zoinal.

Téi ariv amoin, asiz in domi-zourné dann vyé garaj-la dsi in kèss do boi épi lir, rolir é rolir an kor ziska moin téi fini par konète in pé d’zafèr par kèr. Mi rapèl, l’avé i pti biltin pou adéré, é dsi lo biltin l’avé inn dé règ pou la vi militant. Mi souvien bien tazantan moin té i lir kozman Maurice Thorez-in sokrétèr PCF - é moun-la téi di, konm konsèye pou son bann militan.

Li téi di, li souète son bann militan lé angajé dann la vi sostyal kisoi bann sindika, kisoi bann z’asosyasion, mé si ou i rant ladan, i fo ou i fé lo nésésèr pou ète lo méyèr, lo pli onète, lo pli éfikas. Sa té in n’afèr moin téi aprésyé pars dann mon famiy l’avé désèrtin kominis é moin té i oi bien zot té i fé lo méyèr posib pou gingn tout bann kalité moin la mark an-o la, épi sa lété pa fasil dann in sosyété koronpi konm nou téi koné déza dann tan-la é la pa fini zordi.

Mé zami, mon bann dalon, sak téi done konm konsèye ladan lé bien valab zordi. Pou koué mi di sa ? Pars dann la politik d’inyon, mi pans ni doi z’ète lé méyèr é demoun i doi romark nou sé lé méyèr dann nout travaye zour-lo-zour, dann la roshèrch bann zidé, dann la roshèrch l’éfikasité. Lé vré ni pé di galman l’inyon sé la lité mé pa pou pass kal nout z’alyé mé fé avans lo prozé pli dovan. Alor, dalone dalon, i fo nou sé lé méyèr - : fransh vérité !