Mé souvan dé foi, mi panss dir sa, sé fèr prèv bone volonté, mé sé pa si lé bien réalist. Sépa si sé in poinnvizé lé kapab réini in grande majorité d’moune pou ariv in réshofman modéré la tanpératir dsu la tèr.. Sak néna pou Bondyé larzan - dizon lo dolar -, i étoneré amwin toudinkou zot va pran la lite konte lo réshofman klimatik konm in nouvo rolijyon !!!

Sak lé pov mèm é lé difissil azot zoinde zot fin d’moi, lé pa sir zot ossi va konsidèr sa konm in priorité pou zot alé oir bonpé rante zot néna lo vante vide bien souvan - lé ga néna pliss in milyar d’moune i soufèr la fain dsu la tèr épi biento nora pliss ankor. Alor kossa in moune i soufèr la fain i panss, si la par an pli son boujaron sansa bouzaron-antouléka son vante.

Astèr néna sak i gingn zot sosso konm i fo, sak i majine zot vakanss avan toute shoz, sak ilé kontan zot ptite vi ébin d’apré sak mi antan zot i panss zot lé pa résponsab lo réshofman é zot i koné pa koué fèr é koman fèr pou anpèsh la tère tro shofé... Biensir néna bande militan, mé d’apré mwinn zot lé pa tro paré pou sa, pou gingn fé avanss toulmoune konm k’i fo pou l’instan-mé pétète domin... Défoi lé shoz i sava pli vite ké ni kroi ziska alé ki sé, dirékssion in priz de konssyanss mazoritère…

Mé mi sorte antande in n’afèr : i paré mézami l’assanblé zénéral l’ONU i sava otoriz la sézine lo tribinal de La haye konte bande gouvèrnman épi bande péi i fé pa sak i fo épi i réspèkt pa zot promèss pou lité konte lo réshofman klimatik… Biensir tribinal-la la pa in tribinal k’i kondane é ou lé oblijé aplike son zizman, mé kante mèm sé in tribinal zordi néna in pouvoir moral é pétète lo péi kondané li va fèr in n’éfor pou aplike son promèss épi son plan pou lite konte lo réshofman klimatik.

Alon souète sa sé in bon zafèr é alon fé sak i fo pou lite konte l’éshofman klimatik, pétète la tère va moinss réshofé k’ ni krin.

A bon antandèr salu !

Justin