Éstra, gayar, mi èm, mi aprésyé, moin lé kontan !
Mi trouv éstra kan in masson i fé l’inplantasyon in kaz. Li tiliz la résiprok téorèm Pitagor san konète kossa i lé in résiprok, sansa lo téorèm, sansa ankor kissa lété lo Pitagor. Li fé in triyang katrovin santimète in koté, soisant santimète in n’ot koté, in mètr lo troizyèm koté. L’èr-la, li lé sir li nana in l’ang katrovindis dégré*, li la bézoin pou fé lo koin la kaz.
Mi trouv gayar oir demoun fé zardin éstraordinèr èk dé-troi pti boutir zot la trouv par issi, sansa par-la. Mi dmann amoin koman zot i nyabou klimate lo bann plante, san liv, san konsèy, san formasyon, riyink par léspéryans épi la réfléksyon.
Mi èm kan mi antann demoun la rolizyon tamoul, sansa malgash, sansa d’ote ankor résite zot priyèr, zot bone tète la nyabou ramassé avèk zot vyé famiy.
Mi aprésyé parol séga, maloya, kabaré, lo son bob avèk roulèr, pars sa la pa aprann lékol, é zordi li lé la parèy bann zansète té i zoué. Moin lé kontan èk bann provèrb La Rényon, bann sirandane, bann zistoir rakonté, i fé pass zénérasyon an zénérasyon nout sazès, sansa nout foli..

Akoz i apèl sa ilétré ?
Bonpé anparmi bann dominèr i apèl azot "ilétré" mèm si zot lé kiltivé, mèm si zot i porte èk zot la kiltir rényonèz... In fasson anplis pou in pé asir la dominasyon déssi in gran kantité d’moun. Ou lé ilétré ! Ou i konpran sa ? Koman i di ? Oui. Koman i di pou vréman ? Oui shèf ! Oui mètr ?

*80x80+60x60=100x100 ;
6400+3600=10000

Justin