Mwin téi di dann mon kèr : zidé i sar pète an flèr, késtyon répons té i sava fïzé, limazinassion pou in foi é pandan ine èr d’tan i sava ète o pouvoir. Marmaye la kour an fas-a-fas é nou téi sava oir sak nou téi sava oir. I fo kroir épi ozé dan la vi.

Final de kont mwin té i atande oir épi antand in konba rant shèf : dë shèf mèm mouvman an fas-a-fas i pé pa fé otromank’zétinsèl.

Elas, Ménélas, mon kèr lé an filas ! Mwin la pa vï é mwin la pa antande de koi krèv mon lékran. Sirtou mwin la pa antande dê pèrsone téi vé vréman tir nout péi dann la sityassion ké li lé, é sirtou tir band rényoné dann malpassé.

Sé kan la parl propozission d’loi ké mwin la poze amwin késtyon : inn lété pa konpréansib ditou, l’ot lété si tèlman pa konvinkÏ ké mi oi mal koman li sava konvink la roprézantassyon « nassional »-rant guilmé pars kan i di nassyonal mi antan plizanpliss rényoné mé la pa sa !

Mézami mwin lé pa la pou konsèye pèrsone, mé si mwin l’avé, mi diré toulmoune si zot i vé an avoir in kïltïr politik rényonèz néna kékshoz pou fèr : i fo pran toute la litératir politik parti kominis é lir ali. La mwin lé sir zot noré dé shoz pou aprand, dé shoz pou konprand donkalor pou ésplik sa band rogardèr d’télé.

Lo rèss li lé sak li lé, plate, fade, mal kui, indijèst avèk tazantan in pti limyèr alimé dann gran fénoir la kïltïr politik. Arzoute èk sa kan lo stil lé anpoulé, avèk konm k’i diré, in filozofi mal dizéré, lo rézilta li lé konm li lé, é li pé pa z’ète otroman.

Mé antansyon, la zénèss lé la, lintélizans ossi, anklavé par in poizon danzéré k’i apèl léspri d’lintégrassion. Tir linz-la dsi zot, aprésa zot sar bon pou rodémaré.

A bon ékoutèr, salu !

Justin