Mézami, kozman mwin la marke an-o la, mi konépa dann kèl péi li sorte mé fransh vérité mi apréssyé ali pars konm in bonpé zimin mwin la gingn lokazyon apréssyé dan la vi toulézour. Mazine in kou zot la trouv in moune i boté azot é sirtou pou in kalité ké la pèrsone néna. Sa i bote aou… ziska k’in zour wi apèrssoi kalité – l a i touf aou, i anpèsh aou viv – i anpèsh aou réspiré. Alor sak la fé ké ou la apréssyé la pèrsone yèr, i fé ké wi siporte pi li (el) zordi. Dofé dan la paye kann ! Parèye pou lo défo wi apréssyé pa, mé ou lé blijé siporté mé momandoné wi apèrsoi défo-la i pé avoir bon konsékans – antouléka in konsékans ou té i prévoi pa é l’èr-la wi apréssyé la pèrsonne pou lo même rézon ou té apréssyé pa li, oparavan.

Mézami toulézan douze moi, la rou i tourne obli pa é konm i di i vo myé oir lé shoze dan l’tan. Ni shanj mème ni pass noute tan a shanjé é sa i fé pétète noute fors, konm pé s’fèr noute féblèss. Inn-dan l’ote, toute l é rolatif. Alé ! mi kite azot rofléshi la dsi é ni rotrouv pli d’van. Sipétadyé.