Oté

Koman Konpèr Lapin la roul Balène avèk l’Eléfan dann la farine - morso niméro 1

Justin / 8 zwin 2019

JPEG - 43.6 ko

L’avé inn foi, pou inn bone foi, mésyé lo foi, la manz son foi avèk in grinnsèl.
In zour, konpèr lapin té apré bate son karé in pé partou ; li téi sote, li téi kour, li té i vir an atandan l’èr manzé. Li trouv vréman son plézir avèk in van fré k’i satouye ali épi in pti solèye i ramène la santé dann son kor. Mé toudinkou, li apèrsoi L’éléfan épi la balène apré diskité dsi la plaz konmsi inn i fléte l’ot é l’ot i flate inn ; Lapin i domann ai kosa i éspss épi li pass dann boi épi li ariv koté lé dé zaiùo san fé romark ali.dann son kèr, li di : « i fo mi konpran kosa banna l’apré konploté. ! Pars la pad itou dann zot zab itid koz konmsa an amikal. Lé loush sa ! »
Kriké ! Kraké ! Kriké Mésyé ! Kraké Madam !

Konpèr Lapin bien kashyété dann touf patat a Diran i pèrd pa arien dann z’ot konvèrsasyon é sak li antan talèr i fé tonm ali a la ranvèrs.
- « Oté ! Konpèr l’éléfan, balène i di, ou sé lo pli kosto an parmi bann zanimo la tèr, ou é lo pli for, é ou sé kaziman lo pli intélizan ; Mi pans ou lé tayé pou fé in shèf !
- Oté ! Komère Balène, ou sé lo pli kosto zanimo la mèr, ou sé lo pli for, kaziman lo pli intélizan, ou lé tayé pou fé in shèf. »
- Oté ! komère Balène, l’éléfan i di : « Moin néna in projé é mi pans sa i sava bote aou san pour sanInn é l’ot lé fyèr, vèye pa koman. Inn é l’ot lé kontan.
- Oté ! Konpèr L’éléfan, Balène i di « Moin néna in projé, mi pé dir aou sa va bote aou san pour san ! »
Balène i rodi astèr : « Ségnèr l’éléfan, si ni tonm an antant tou lé dé, ou va komann bann zanimo la tèr é moin va komann zanimo la tèr. Di amoin si sa i bote aou ! »
L’éléfan i rodi son tour : »Ségnère Balène, si ou i tonm an antant avèk moin, vou sar la Rène bann zanimo la mèr, é moin sar lo Roi la bann zanimo la tèr ; di amoin si sa i bote aou ! »
Kriké ! Kraké ! Kriké Méyé ! Kraké Madam !

Lé dé zanimo lé kontan, zot lé fyèr ; Lé dé i di : sa i bote azot san pour san. Lapin son koté i di dann son kèr : »koméla moin lé lib ! koméla tout zanimo lé lib ! é oila ké sé dé moudi i vé fé zésklav avèk nou i kol ar pa sa koko ! i fo mi trouv i fyon pou kal azot in kou. Moin lé p agro, moin é pa kosto mé mon momon avèk mon papa la paf é amoin, la paf é in kouyon. Séyé ! Gété ! Nou va oir la suite lo program !
Promyé morso la fini-dézyèm pou talèr-tanto.