Matante Zélida la ékrir Justin :
— Mon shèr nové, mon spès salté, mi oi déza bann rouj de fon, apré dir, pars zot i koné di aryink movèz shoz : "la vi lé tro shèr ! La vi lé tro shèr !". Moin la vi azot dann télé apré dir k’i fo diminyé vin pou san bann marshandiz lo pli nésésèr...
Kosa i lé so marshandiz-la ? Zot i oi pa l’moun i fé pi in kont èk sa ? Zot i vé, zot i vé pa, demoun i èm lé shoz k’i sort an déor, é sa sé d’zafèr k’i vann shèr ! Lé pa pli konpliké k’sa ! Zot i kroi ankor demoun i viv konm dann tan lontan don ?

Justin la fé pou répons :
— Pars, vou, matant, vi trouv la vi lé bon marshé vou ? Vi trouv bann marshandiz, sak lé byin nésésèr, lé pa shèr vou ?
Alor, manzé lé pa shèr ! Produi pou nétoiyé lé bon marshé ! Zéfé pou marmay i done pou aryin ! La mityèl i gingn pou la po d’patat ! É larzan, byin antandi, i trouv sou la pat shoval !
Sort la don matant ! I plé aou si tèlman rakont la mantri ? Asé fé kroir demoun ou lé a-flo, ou i rotrouv aou byin avèk out ti moné la rotrèt ! Sé inn shyas antann zafèr konmsa ! Koman la politik la droit la niabou boush out zyé don ?

Justin