Oté

Koman Mulikanu la aprann domoun parésé pou travaye-morso niméro 2

Justin / 13 avril 2019

JPEG - 43.6 ko

L’avé inn foi pou inn bone foi mésyé lo foi la manz son foi avèk in grinnsèl.

Tout demoun la mète a kriyé :
" Li na ka pran son shomin alé, nou la pa bézoin ali isi shé nou "
Mulikamu la domann la parol épi li la di :
" Mésyé médam la osyété ékout amoin bien sak mi sava dir azot. Avan moin la vni si shé zot, lo gran Mguri-mgori la vni oir amoin an rèv épi la di amoin alé instal aou shé banna épi aprann azot pou travaye. Zot lé parèss é zot parèss va fini par kout azot shèr ziska fé pèrd azot la vi. Moin la vni isi pou di azot fé antansyon é pou anpèsh sak i doi ariv azot. "
Bien an kolèr lo moun la mète a kriyé, a irlé éMulikanu la di :
« Mi rann amoin kont zot i sava pèrd zot vi » é li la parti. Li la kite lo bo péi lo bon flèv.
Li la lèv son kan épi li la parti.

Pèrsone la pi antann parl Mulikamu in bon bout tan. Solman in zour demoun té i dsan lo bon flèv an kanote la vni dann vilaz épi zot la rakont in drol zafèr. Mulikanu la instal ali pli ba dann lo flèv épi li la pran in vintène fam. Banna la transport bann bèl-bèl rosh épi bann tronn boi pou zète sa dann lo bon flèv, landroi li lété pli mins.
Bann moun parèss la pète a rir é la rir bon kèr siouplé :
" Mulikamu la pèrd la tète. Travaye la fé pèrd ali la rézon "

Kriké ! Kraké ! Kriké mésyé ! Kraké madam !

Mi pé dir azot zot la pa rir tro lontan. La sézon la plui l’arivé é lo flèv la débordé. Shak sézon la plui lo téi mont dann flèv épi kan li té i rosava li té i kite in tapi limon é bann plantaz téi pouss bien dosi téi fo oir. So kou isi lo flèv téi bèss pi, an kontrèr.
Lo linondasyon téi anvayi partou, téi détrui bann kaz, téi noiye demoun épi tyé bann zanimo. Sé lèr demoun la konpri Mulikanu avèk son bann fam l’avé fé in baraz dsi lo flèv é lo baraz la transform lo li lo flèv dann in gran lak Mulikanu l’avé tir son vanzans dsi lo bann moun l’avé shass ali dann lo bo péi.

Lo moun té dézéspéré, zot la sort bordaz lo flèv pou alé dann la foré é kan la sézon dé plui té fini zot la rotourn bordaz lo flèv pou rokonstui lin bann nouvo vilaz, labour la tèr pou fé bann nouvo karo épi soign zanimo. Bordaz lo lak. Bann moun léspri té pli ouvèr la komans konprann sak Mulikanu la fé lété pa in vanzans. An kontrèr li l’avé sov lo moun an aplikan lo prédiksyon lo gran Mguri-mgori é son prédiksyon lété d’mète lo moun o travaye.
Bann bononm téi viv dann lo bo péi dsu bordaz lo lak l’arète viv konm in bann parésé é la mète azot a travaye. Zot la vni travayèr, in bann mulikanu konm i di dann langaj lo bo péi é zot bondyé sé Mulikanu é zot i fé sakrifis pou li shak ané é zot, zot i done kado épi si i fo zot i apèl ali o sokour kan zot la bézoin konmsi si lété in vré Bondyé.

Si zistoir lé mantèr, la pa moin lotèr. Koton mayi i koul, rosh i flote… L’avé inn foi pou inn bone foi mésyé lo foi la manz son foi avèk in grinnsèl. Dann la nuite si néna la lune zot i é antann ali kriyé : Rann amoin mon foi ! Rann amoin mon foi !

Zistoir Mulikanu la fini.