Dan la nuit samdi, in moun, dann son loto, i mont Plateau Cailloux. Li sort Sin-pol. Sou in pon li oi in moun la ginye in laksidan moto. Li éstop pou li sokour lo boug. Ala lo boug i arvir dsï li. Dë kamarad lo boug té i kashèt dann bordaj shomin i atak ali, i vol son loto épi i vèrs lésans sï li, Zot i mèt de fë sï lo boug*.
Astèr lo boug lé lopital, brïlé. Bann moun la fé krime-la la sové, sé pa kansa va trap azot. Ala dëmoun i di : Pou kosa la fé sa ? Pou le boug lété viktime, késtion-la i intérès pa lï. Pou son bann famy, sa in bann kriminèl i mérit la mor épi zot i arèt la-mem. Somanké, na poin n’rézon, na poin lésplikasion. Le bann moun la fé sa sé in bann délinkan, zordï zot lé kriminèl. Somanké zot lé fièr sak zot la fé. Nana in n’afèr i klosh pa dann zot tèt : zot na pi d’ropèr**. Sé konm sa ki di !
Ala demoun i di : i fo fé si, i fo fé la. Mèt la prizon, tir pi, koup la tèt, brïl azot parèy ! Pa zordï, pa domin,la loi va trap azot solman déga zot la fé nora poin pèrsone pou réparé. Zot nora zot pénitans, mé la pénitans po in pé i anpèsh pa lé z’ot fé parèy. Sak nou pé dir la réprésion la pa in solision, él tousèl. La prévansion, i fo fèr, mé komansa, Plis la solision sar sinp, plis sar in fos-bone solision. Koman sort dann in sosiété la violans ?

Justin

*la victime s’appelle J.F.Hoareau.On ne peut que s’indigner de ce qui lui est arrivé. **plus de repères moraux et de repères sociaux.