Kozman-la, biensir la pa in provèrb mé kékshoz ou i antann tanzaot. Mi souvien moin l’avé antann sa dann in zéléksyon dann in péi i apèl l’Espagne. In gro kandida té i di kozman moin la mark an-o la par raport in n’ot gro kandida. Dann d’ot ka, mi ansouvien bien néna bien lontan in profésèr fransé-latin-grèk té i fé tranm anou si tèlman li lété sévèr sof k’in zour nou a romark son madam téi téroriz ali-l’èrla nou la pans li lété pa tro lézitime pou fé tranm anou lonm fèye. Aprésa moin la antann bann gran politik, mèm bann gran militèr, final de kont té z’otmadam té i komann azot. Alé ! Mi kite azot rofléshi la dsi é ni artrouv pli d’van. Sipétadyé.