Oté

« Komans par komansman ! Mé ousa i lé komansman-la ? »

In kozman pou la rout

Justin / 24 zanvié 2020

JPEG - 43.6 ko

Mésyé Médam, LaSosyété, koz èk moin sé koz èk in kouyon-mé sé o pyé d’lo mir k’i oi lo mason. Zot i koné dopi k’moin lé dsi la tèr, moin lé toultan apré domandé par kèl bout i komans. Pou désèrtin lé fasil réponn in késtyon konmsa : sifi k’i komans par komansman. Aprann in léson par lo komansman ! L’ariv amoin plizyèr foi komans aprann par la fin, sansa par l’milyé. Sansa ankor konm k’i gingn. Sa i rapèl amoin zistoir inn an parmi mon bann pti zanfan : la métrèss la done son klass in fonnkèr Paul Verlaine pou aprann par kèr é li té i vé pa aprann sa pars solon li té ékri an vyé fransé. Afors flaté, li la fini par aprann é li la gingn in bon note… Aprésa li la di amoin : Moin la di aou fonnkèr-la lé an vyé fransé, alé oir lé pa tèlman ! Final de kont, lo pli inportan sé d’ariv a fèr sak ou i vé fé. Alé ! Mi kite azot rofléshi la dsi é ni artrouv pli d’van. Sipétadyé !